ممبئی: بالی ووڈ کے ایکشن ہیرو اکشے کماراپنے والٹ میں اپنی خوبصورت اہلیہ ٹوئنکل کھنا کے بجائے ہالی ووڈ کے مشہور اسٹار کی تصویر رکھتے ہیں۔
انسان جس سے محبت کرتا ہے اس کی تصویر ہمیشہ اپنے پاس رکھتا ہے، بہت سے لوگ اپنی اہلیہ اور بچوں کی جب کہ بعض لوگ اپنے والدین کی تصویر اپنے پرس میں رکھتے ہیں یہ ان کی جانب سے اپنے پیاروں سے محبت کے اظہار کا طریقہ ہوتا ہے،بالی ووڈ کے کھلاڑی اکشے کمار بھی اپنے والٹ میں تصویر رکھتے ہیں لیکن اپنی اہلیہ ٹوئنکل کھنا کی نہیں بلکہ ہالی ووڈ کے لیجنڈ اداکار چارلی چپلن کی۔ بھارتی میڈیا کے مطابق اکشے کمار چارلی چپلن کے بہت بڑے مداح ہیں اور ان کے نظریات اور خیالات پر نہ صرف یقین رکھتے ہیں بلکہ عملی زندگی میں ان کے نظریات پر چلنے کی کوشش بھی کرتے ہیں ، ایک انٹرویو کے دوران اکشے کمار نے کہا تھا کہ وہ چارلی چپلن کی جانب سے کہی جانے والی اس بات پر بہت یقین رکھتے ہیں کہ زندگی دور سے دیکھنے پر بہت خوشگوار اور مزاحیہ محسوس ہوتی ہے جب کہ قریب سے دیکھنے پر زندگی مسائل اور غموں سے بھری پڑی ہے۔
اکشے کمار کی زندگی بھی اسی بات کی عکاس ہے اکشے کا شمار آج بالی ووڈ کے مہنگے ترین اداکاروں میں ہوتا ہے لیکن انہوں نے یہ مقام آسانی سے حاصل نہیں کیا انہوں نے کامیابی حاصل کرنے کے لیے بہت محنت اور کوشش کی ہے، زندگی کی گاڑی کو چلانے کے لیے ابتدا میں اکشے کمار نے بطور ویٹر اور شیف کام کیا بعد ازاں انہوں نے مارشل آرٹس اور کراٹے کی ٹریننگ بھی دی تاہم ان کے خواب بہت بڑے تھے اورانہوں نے اپنے خوابوں کو پوراکرنے کے لیے کوشش جاری رکھی اور آج وہ بالی ووڈ کے کامیاب اداکاروں میں سےایک ہیں۔ واضح رہے کہ اکشے کمار بھارتی ٹی وی کے شو ’’دی گریٹ انڈین لافٹر چیلنج‘‘ میں بہت جلد بطورجج نظرآئیں گے جس کے پہلی قسط میں ان کے ساتھ اداکارسیف علی خان ماضی کے مشہور گانے میں کھلاڑی تو اناڑی پر پرفارم کرتے نظر آئیں گے۔
