صرف 30 منٹ میں ایچ آئی وی شناخت کرنے والی یو ایس بی اسٹک ایجاد

MH Kazmi November 11, 2016 1 min read

HIV identifying USB stick invention, only 30 minutes

لنندن: برطانوی سائنسدانوں نے ایچ آئی وی کی شناخت کرنے والا یو ایس بی نما آلہ تیار کیا ہے جو صرف 30 منٹ میں وائرس کو بھانپ سکتا ہے۔

اس پر خون کا ایک قطرہ ٹپکا کر اسے کمپیوٹر ٹیبلٹ یا دوسرے دستی آلے کی یو ایس بی پورٹ پر لگادیا جاتا ہے۔ اس کے بعدسافٹ ویئر 30 منٹ تک خون کا تجزیہ کرکے بتاتا ہے کہ مریض کے خون میں ایچ آئی وی ہے یا نہیں۔ اس ٹیکنالوجی کےذریعے درست ترین انداز میں ایچ آئی وی کی شناخت کی جاسکتی ہے۔اس آلے کو امپیریل کالج لندن نے امراض کی تشخیصی کمپنی ڈی این اے الیکٹرانکس کی مدد سے تیار کیا ہے۔ ماہرین کے مطابق یہ آلہ دور دراز اور غریب علاقوں کے مریضوں میں ایچ آئی وی شناخت کرنے کے لیے بہت مؤثر ثابت ہوسکتا ہے۔ اچھی بات یہ ہے کہ یوایس بی صرف منٹوں میں تنائج دیتی ہے جب کہایچآئی وی کےروایتی ٹیسٹ میں کئی دن صرف ہوجاتے ہیں۔

اس آلے پر کام کرنے والے سائنسدان کا کہنا ہےکہ مروجہ ایچ آئی وی ٹیسٹ مہنگے اور وقت طلب ہوتے ہیں جب کہ ان کے لیے پیچیدہ نطام کی ضرورت ہوتی ہے۔ لیکن یہ آلہ بنانا ایسا ہی ہے جیسے پوری تجربہ گاہ کو ایک یو ایس بی اسٹک میں سکیڑنا ہے۔

ایچ آئی وی کا علاج اس وقت طاقتور اینٹی ریٹرو وائرل دواؤں سے کیا جارہا ہے جو خون میں وائرس کو کم سےکم کرتی ہیں جب کہ اسے جانچنے کے لیے باقاعدگی سے بلڈ ٹیسٹ کرانا پڑتا ہے تاکہ وائرس کی تعداد و مقدار پر نظر رکھی جاسکے۔ اگر دوا اثر نہیں کررہی اور وائرس طاقتور ہورہا ہو تو اس کی نشاندہی بھی خون کےذریعے ہی ہوتی ہے اور پھر دوسرا طریقہ علاج ڈھونڈنا پڑتا ہے۔ امید ہے کہ یہ آسان طریقہ تشخیص مریضوں کے لیے ایک نوید ثابت ہوگا جس سے وہ خود اپنے خون میں وائرس کی مقدار بھی معلوم کرسکیں گے۔