لاہور: ملزم اعجاز، اسکے بھائی اور والدہ کے خلاف مقدمہ درج، پولیس نے تینوں کو گرفتار کرلیا۔ ہربنس پورہ کے علاقے میں گھریلو ناچاقی پر شوہر نے اپنے بھائی اور والدہ سے ملکر مبینہ طور پر 30 سالہ بیوی کو گلا دبا کر موت کے گھاٹ اتار دیا۔
تفصیلات کے مطابق ہربنس پورہ کے علاقے سلامت پورہ کے رہائشی موٹر مکینک اعجاز احمد کی چند سال قبل گوجرانوالہ کی رہائشی اپنی پھوپھی کی بیٹی صبا سے شادی ہوئی تھی جس سے اس کے
3 بچے ہیں۔ ہفتہ اور اتوار کی درمیانی شب پولیس کو اطلاع ملی کہ سلامت پورہ میں شوہر اعجاز نے اپنے بھائی اشتیاق اور والدہ نسرین بی بی سے ملکر بیوی کو گلا دبا کر قتل کر دیا ہے جس پر پولیس نے خاتون صبا بی بی کی لاش کو قبضہ میں لیکر پوسٹ مارٹم کیلئے مردہ خانے منتقل کر دیا۔ پولیس نے مقتولہ صبا کی والدہ کی مدعیت میں شوہر اعجاز اس کے بھائی اور والدہ کیخلاف مقدمہ درج کر کے تینوں ملزموں کو گرفتار کرلیا۔ ایس ایچ او تھانہ ہربنس پورہ کا کہنا تھا خاتون کو گلا دبا کر قتل کیا گیا جبکہ ملزم اعجاز نے بیان دیا کہ اس نے اپنی بیوی کو قتل نہیں کیا اس نے خود کشی کی ہے۔
