سیالکوٹ روڈ پر چاند گاڑی انسپکٹر سمیع اللہ کے کیری ڈبہ سے ٹکرا گئی ، انسپکٹر نے آہنی راڈ سے ڈرائیور پر تشدد کیا ، اہل علاقہ نے بھی انسپکٹر کی تھپڑوں مکوں سے درگت بنا دی ، موقع سے فرار
گوجرانوالہ: گوجرانوالہ میں چاند گاڑی کیری ڈبہ کے ساتھ ٹکرانے پر بھپرے ہوئے تھانیدار نے سا تھی کے ہمراہ ڈرائیور کو ڈنڈوں ، تھپڑوں ، مکوں سے بدترین تشدد کا نشانہ بنا ڈالا ۔
شہریوں نے روکنے پر بدتمیزی کرنیوالے شیر جوان کی بھی درگت بنا ڈالی ۔ سیالکوٹ روڈ پر تھانہ صدر وزیر آباد میں تعینات سب انسپکٹر سمیع اللہ کے کیری ڈبہ کے ساتھ چاند گاڑی ٹکرا گئی جس پر بھپرے ہوئے سب انسپکٹر نے اپنے ساتھی کے ہمراہ چاند گاڑی ڈرائیور چاند عرف چندو کو ڈنڈوں ، مکوں ، تھپڑوں کے ساتھ وحشیانہ تشدد کا نشانہ بنایا ۔
اس دوران چا ند گاڑی ڈرائیور کے بے ہوش ہونے پر شہریوں نے بیچ بچائو کروانے کی کوشش کی تو سب انسپکٹر سمیع اللہ بدتمیزی پر اتر آیا جس پر شہریوں نے بھی سب انسپکٹر کی تھپڑوں ، مکوں سے درگت بنائی تو سب انسپکٹر موقع غنیمت جانتے ہوئے گاڑی میں بیٹھ کر رفو چکر ہو گیا ۔
واقعہ کی اطلاع ملتے ہی ریسکیو اہلکاروں نے موقع پر پہنچ کر سب انسپکٹر کے تشدد سے بے ہوش ہو نیوالے چاند گاڑی ڈرائیور کو طبی امداد کی فراہمی کیلئے ہسپتال منتقل کر دیا ۔
