جرمنی، ہیمبرگ میں مودی کے خلاف احتجاجی مظاہرہ انتہائی کامیاب رہا قائد کشمیر بیرسٹر سلطان محمود چوہدری کی کال پر یورپ بھر کے لوگوں نے لبیک کہا، زاہد ہاشمی، تحریک انصاف فرانس،
پیرس۔ ( یس اردو نیوز) فرانس میں مقیم ممتاز کشمیری راہنما، کشمیر تحریک انصاف کے مرکزی نائب صدر ذاہد اقبال ہاشمی نے کہا کہ جرمنی کے شہر ہیمبرگ میں مودی کے خلاف احتجاجی مظاہرہ انتہائی کامیاب رہا، مختلف یورپی ممالک سے لوگوں کی بڑی تعداد نے قاہد کشمیر بیرسٹر سلطان محمود چوہدری کی کال پر لبیک کہتے ہوئے مظاہرے میں شرکت کی۔ احتجاجی مظاہرے کے دوران لوگوں کا جوش و جذبہ دیدنی تھا جس سے صاف ظاہر ہوتا ہے کہ کشمیری قوم اپنے بنیادی حقوق کے حصول کے لئے دہائیوں سے جاری جدوجھد کو کبھی رکنے نہیں دے گی اور ایک نہ ایک دن مظلوم کشمیریوں کو ان کا حق مل کر رہے گا جس کا وعدہ اقوام متحدہ کی قراردادوں کی شکل میں دنیا نے کر رکھا ہے۔ ان خیالات کا اظہار انہوں نے صحافیوں سے گفتگو کرتے ہوئے کیا۔ ذاہد اقبال ہاشمی نے کہا کہ کشمیری قوم ایک پر امن قوم ہے لیکن افسوس کا مقام ہے کہ بھارت کشمیریوں کی پرامن جدوجھد کو منفی رنگ دینے کی ناکام کوشش کر رہا ہے۔ اقوام عالم کو مقبوضہ کشمیر میں انسانی حقوق کی خلاف ورزیوں کا نوٹس لینا چاہیے اور بھارتی ظلم و ستم اور انسانی حقوق کی خلاف ورزیوں کو روکنے کے لیے کردار ادا کرنا چاہیے۔ بھارت مقبوضہ کشمیر میں انسانی حقوق کی خلاف ورزیوں پر پردہ ڈالنے کے لیے کیٔ بار انسانی حقوق کی تنظیموں کے نمائندوں کو وہاں جانے سے روک چکا ہے جو کہ ایک جمہوری سسٹم کی نفی ہے۔ گزشتہ ایک سال کے دوران کشمیر میں سینکڑوں لوگ اپنی زندگی سے محروم ہو چکے ہیں جبکہ ہزاروں کی تعداد میں لوگ زخمی ہوئے ہیں اور ان میں بڑی تعداد ان سکول جانے والے بچوں کی ہے جن کی آج آنکھیں سلامت نہیں ہیں۔ کشمیر کی ابتر صورتحال کا حل اقوام متحدہ کی قراردادوں پر عملدرآمد ہے اور دنیا کو ان قراردادوں پر عملدرآمد یقینی بنانے کے لیے اپناکردار ادا کرنا چاہیے۔
