دفتر خارجہ میں بھارتی سفارتکار کی طلبی، ترکی میں انسانی جانوں کے ضیاع پر اظہار افسوس

اسلام آباد(ایس ایم حسنین) قابض بھارتی فورسز کی طرف سے لائن آف کنٹرول سے ملحقہ علاقوں میں بھاری ہتھیاروں کے ساتھ بلا اشتعال فائرنگ کے جواب میں سینئربھارتی سفارتکار کو دفتر خارجہ طلب کر کے شدید احتجاج کیا گیا۔ ترجمان دفتر خارجہ کے مطابق سینئر بھارتی سفارتکار کو آج دفتر خارجہ طلب کرکے قابض بھارتی فوج کی جانب سے 29 اکتوبر 2020 کو لائن آف کنٹرول پر جنگ بندی کی خلاف ورزیوں اور اس کے نتیجے میں دو بے گناہ شہریوں کے زخمی ہونے پر شدیداحتجاج کیا گیا۔ قابض بھارتی فوج کی بلاجوازاور بلاامتیاز فائرنگ کے نتیجے میں ’ایل۔او۔سی‘ کے نیزہ پیر اور رکھ چکری سیکٹرز میں 22 سالہ رخسانہ شاہین دختر محمد اقبال سکنہ گاوں کرنی اور 36 سالہ محمد اعظم ولد چنن دین سکنہ گاوں اکھوڑی شدید زخمی ہوگئے۔بیان میں واضح کیا گیا کہ قابض بھارتی فوج ’ایل۔او۔سی‘ اور ’ورکنگ۔باونڈری‘ پر عام شہری آبادی کو آرٹلری اور بھاری وخودکار ہتھیاروں سے مسلسل نشانہ بنارہی ہے۔ رواں برس 2020ءمیں بھارت نے 2580مرتبہ جنگ بندی کی خلاف ورزی کی جس کے نتیجے میں 19 بے گناہ شہری شہید اور 199شدید زخمی ہوئے۔ بیان میں قابض بھارتی فوج کی جانب سے بے گناہ شہری آبادی کو دانستہ نشانہ بنانے کی شدید مذمت کرتے ہوئے بھارت پر زوردیا گیا کہ بے حسی پر مبنی یہ کارروائیاں 2003 کے جنگ بندی معاہدے، انسانی عظمت ووقار، بین الاقوامی انسانی حقوق و قوانین اور پیشہ وارنہ فوجی طرز عمل کے برعکس اور اس کی صریحاً خلاف ورزی ہے۔ بین الاقوامی قانون کی خلاف ورزیاں ایل او سی پر کشیدگی بڑھانے کی مسلسل بھارتی کوششوں کا مظہر اور خطے کے امن وسلامتی کے لئے خطرہ ہیں۔ ایل او سی اور ورکنگ باونڈری پر کشیدگی میں اضافہ کے ذریعے بھارت غیرقانونی طور پر اپنے زیر قبضہ جموں وکشمیر میں انسانی حقوق کی سنگین ترین خلاف ورزیوں سے توجہ نہیں ہٹا سکتا۔ بھارت پر زوردیا گیا کہ 2003 کے جنگ بندی سمجھوتے کا احترام کرے، تازہ ترین اور اس سے قبل ہونے والی جنگ بندی کی دانستہ خلاف ورزیوں کے واقعات کی تحقیقات کرائے ،’ ایل اوسی ‘ اور ’ورکنگ باونڈری‘ پر امن قائم کرے۔ بھارت پر یہ بھی زوردیاگیا کہ بھارت اقوام متحدہ کے فوجی مبصر گروپ برائے پاکستان اور بھارت کو اقوام متحدہ کی سلامتی کونسل کی قراردادوں کے مطابق تفویض کردہ اپنا کردار ادا کرنے کی اجازت دے۔ دریں اثنا دفتر خارجہ کی طرف سے ترکی میں زلزلے سے قیمتی انسانی جانوں کے ضیاع پر دکھ اور افسوس کا اظہار کیا گیا۔ دفتر خارجہ کی طرف سے جاری بیان میں کہا گیا ہے کہ پاکستان کی حکومت اور عوام ترکی کے شہر ازمیراور اس کے گردونواح کے علاقوں میں آج صبح آنے والے طاقتور زلزلے کے نتیجے میں قیمتی انسانی جانوں کے ضیاع اور بڑی تعداد میں لوگوں کے زخمی ہونے پر اپنے گہرے رنج وغم اور افسوس کا اظہار کرتا ہے اور متاثرہ خاندانوں سے دلی ہمدردی کرتے ہیں۔ بیان میں کہا گیا ہے کہ اس قدرتی آفت کے نیچے میں جاں بحق ہونے والوں کے غم اور دعا میں ہم شریک ہیں اور زخمیوں کی جلد صحت یابی کی دعا کرتے ہیں۔ بیان میں واضح کیا گیا کہ ہمیشہ کی طرح پاکستان کے عوام اپنے ترک بھائیوں اوربہنوں کی تکلیف کے اس موقع پر ان کے ساتھ ہیں اور ان کے ساتھ بھرپور یک جہتی کا اظہار کرتے ہیں۔ حکومت پاکستان ترک بھائیوں بہنوں کے غم کی اس گھڑی میں ہر طرح سے ان کی مدد اور معاونت کے لئے تیار ہے۔