اسلام آباد (ویب ڈیسک) وفاقی وزیر مذہبی امور پیر نور الحق قادری نے کہاہے کہ ایران میں موجود پاکستانی زائرین کی واپسی کیلئے لائحہ عمل طے کیا جارہا ہے اسی طرح زیارات کے حوالے سے پالیسی کا اعلان بھی جلد کیا جائے گا ۔ان خیالات کا اظہار انہوں نے مجلس وحدت مسلمین پاکستان کے مرکزی سیکرٹری سیاسیات اسد عباس نقوی کے ساتھ اپنے دفتر میں ملاقات کے دوران کیا۔ملاقات میں تفتان بارڈرپر پھنسے ہوئے زائرین کی مشکلات اور طبی سہولیات کے فقدان کے حوالے سے بات چیت کی گئی ایم ڈبلیو ایم کے رہنما نے کہ کرونا وائرس کی رپورٹ کے بعد ایران میں ہزاروں پاکستانی زائرین پھنسے ہوئے ہیں ان کو ایران کے اندر قیام و طعام سمیت متعدد مشکلات درپیش ہیں ایرانی سفارت خانے کو اس سلسلے میں موثر اقدامات کی ہدایات کی جانی چاہیے حکومت پاکستان زائرین کی بحفاظت اور فوری واپسی کے لیے ضروری اقدامات کرے تاکہ زائرین اور ان کے اہل خانہ کے اضطراب کا خاتمہ ہو۔
وفاقی وزیر نے یقین دہانی کراتے ہوئے کہا کہ حکومت زائرین کے مسئلے پر سنجیدگی سے غور وفکر کر رہی ہے۔ایران سے زائرین اور طلبا کی واپسی کے لیے بہترین لائحہ عمل طے کیا جارہا ہے۔انہوں نے کہا کہ زائرین کی حفاظت اور ان کے مسائل کا حل ہماری ترجیحات کا حصہ ہیں۔بہترین میکینزم پر مبنی زیارات پالیسی کا جلد اعلان کیا جائے گا۔
