پشاور(نمائندہ یس نیوز) صوبہ خیبر پختونخوا کے ضلع بٹگرام میں زلزلے کے باعث بھگڈر مچ جانے سے 57 طلباء معمولی زخمی ہوگئے۔
صوبائی ڈیزاسٹر مینجمنٹ اتھارٹی (پی ڈی ایم اے) کے مطابق پیر 5 ستمبر کی صبح خیبر پختونخوا کے مختلف اضلاع میں 4.7 شدت کا زلزلہ آیا۔
پی ڈی ایم اے کے مطابق زلزلے کے نتیجے میں کسی قسم کا جانی یا مالی نقصان نہیں ہوا، تاہم بٹگرام میں ایک اسکول کی تیسری منزل پر پڑھائی میں مصروف طلباء میں بھگڈر مچ گئی۔
بھگڈر اور افراتفری کے نتیجے میں 57 بچے معمولی زخمی ہوگئے، جنھیں مقامی ہسپتال منتقل کردیا گیا۔
ڈپٹی کمشنر (ڈی سی) آفس کے مطابق 3 بچوں کی حالت تشویش ناک ہے، جنھیں ضرورت پڑنے پر پشاور منتقل کیا جاسکتا ہے۔
اس سے قبل اکتوبر 2015 میں پشاور سمیت ملک کے مختلف علاقوں میں 7.5 شدت کا زلزلہ آیا تھا، جس کے نتیجے میں 220 سے زائد افراد ہلاک جبکہ 1000 سے زائد زخمی ہوگئے تھے۔
جبکہ 8 اکتوبر 2005 کو پاکستان کے شمالی علاقوں اور کشمیر میں آنے والے بدترین زلزلے کے نتیجے میں 50 ہزار سے زائد افراد ہلاک اور لاکھوں بے گھر ہوگئے تھے۔
