سیالکوٹ میں تین سگی بہنوں کے قتل کاڈراپ سین ہوگیا، تینوں کمسن بہنوں کی موت چاٹ کھانے سے نہیں زہر دیئے جانے سے ہوئی۔
میڈیکل رپورٹ میں انکشاف کے بعد بچیوں کی سوتیلی ماں نے پولیس کے سامنے زہردینے کا اعتراف کرلیا۔ نیکاپورہ میں 17جون کو افطاری کے وقت سموسے اور چاٹ کھانے سے 3کم سن بچیوں کی حالت بگڑی توانہیں اسپتال لایاگیا۔لیکن تین سالہ زویا، 5سالہ آمنہ اور7سالہ آیت زندگی کی بازی ہارگئیں۔ پولیس نے والدین کی درخواست پر چاٹ فروش اور سموسے والے کے خلاف مقدمہ درج کر کے تفتیش شروع کر دی تھی۔ وزیر اعلیٰ پنجاب کی جانب سے نوٹس بھی لیاگیا جس پرمشترکہ تحقیقاتی ٹیم نے کھانے کے اجزاء لیبارٹری بھجوائے تورپورٹ کلئیر آئی، لیکن وہ چاٹ جوبچیوں نے کھائی تھی اس کے اجزاء میں فاسفورس کی آمیزش پائی گئی۔ پولیس نے سوتیلی ماں اورباپ کوحراست میں لیا توماں نے سب کچھ اگل دیا، تفتیش میں پولیس کے سامنے ماں نے اعتراف جرم کیا کہ چارسال سے اولاد نہ ہونے پر وہ ذہنی تناؤ کا شکارتھی جس پراس نے یہ قدم اٹھایا۔
