امریکی ماڈل اور ٹی وی اسٹار کم کرڈیشین ویسٹ نے ایک گاسپ ویب سائٹ پر مقدمہ دائر کر نے کا فیصلہ کرلیا ہے جس نے دعویٰ کیا تھا کہ گذشتہ ہفتے پیرس میں انھوں نے لوٹے جانے کی جھوٹی افواہ پھیلائی تھی۔
میڈیا رپورٹ کے مطابق مقدمہ ہتک عزت کا ہے تاہم اس میں نقصانات کے بارے میں وضاحت نہیں۔ یہ مقدمہ گاسپ سائٹ میڈیا ٹیک آؤٹ اور ان کے بانی فریڈ موانگاگوہنگا دونوں کے خلاف دائر کیا گیا ۔
پولیس کے مطابق رواں ماہ کے اوائل میں مسلح ڈاکوؤں نے کم کرڈیشین کو پیرس کے ایک فلیٹ میں باندھ دیا تھا اور ایک کروڑ ڈالر کے زیورات لے کر فرار ہو گئے تھے۔
یہ مقدمہ نیویارک کی وفاقی عدالت میں دائر کیا گیاجس میں کہا گیا کہ فرانس میں ڈاکے کے ایک خوفناک اور المناک واقعے کی شکار کم کرڈیشین کو امریکہ واپسی پر مزید نشانہ بنایا گیا اور اس بار ایک آن لائن گاسپ سائٹ اس میں شامل ہے جس نے اکتوبر کے اوائل میں متعدد مضامین کے ذریعے انھیں جھوٹی اور چور کہا۔
اس میں کہا گیا کہ مضامین میں بغیر کسی ٹھوس شواہد کے یہ دعویٰ کیا گیا کرڈیشین نے ڈکیتی کی غلط خبر دی، تشدد کا نشانہ بنائے جانے کے بارے میں دروغ گوئی سے کام لیا اور پھر انشورنس کمپنی نے لاکھوں ڈالر ٹھگنے کا جھوٹا دعویٰ کیا۔
مقدمے میں کہا گیا کہ مسٹر موانگاگوہنگا نے انھیں جھوٹی اور مجرم کہنے پر معافی نامہ شائع کرنے اور معافی مانگنے سے انکار کر دیا تاہم ابھی تک میڈیا میک آؤٹ نے اس پر کوئی تبصرہ نہیں کیا۔
خیال رہے کہ 35 سالہ کم دو بچوں کی ماں ہیں اور انھوں نے موسیقار کانیے ویسٹ سے شادی کی اور وہ اپنی ریئلٹی ٹی وی سیریز کی بدولت امریکہ کے بیشتر گھروں میں جانی پہچانی جاتی ہیں۔
