ممبئی: بھارتی کرکٹ ٹیم کے کپتان ویرات کوہلی اسٹیڈیم میں اپنی صلاحیتوں کے جھنڈے گاڑنے کے بعد اب فلموں میں اپنی اداکاری کے جوہر دکھانےکی تیاریوں میں ہیں۔
کرکٹرویرات کوہلی اپنی جارحانہ بیٹنگ اورزبردست پرفارمنس سے کرکٹ شائقین کا دل تو جیت ہی چکے ہیں اوراب اپنے کیرئیرکو آگے بڑھاتے ہوئے فلموں کے شائقین کے دل بھی جیتنے کی تیاریوں میں ہیں۔ حال ہی میں ویرات کوہلی اورانوشکا شرمانے کپڑوں کے ایک برانڈ کے اشتہارمیں کام کیا ہے، اشتہارمیں دونوں کو ایک شادی میں شرکت کرتے ہوئے دکھایاگیا۔ اس اشتہارمیں دونوں کی کیمسٹری کے علاوہ ویرات کوہلی کی اداکاری کو بھی بے حد پسند کیا گیا اور یہاں تک کہا جانے لگا کہ ویرات میں اداکاری کے جراثیم موجود ہیں اور وہ انوشکا شرما سے زیادہ بہتر اداکار ہیں۔ بھارتی میڈیا اورویرات کے مداحوں کے علاوہ ان کی اداکاری کی صلاحیتوں کو بالی ووڈ کے مایاناز ہدایت کار کرن جوہر نے بھی نوٹس کیا اورانہوں نے ٹوئٹر پرویرات کوہلی کی اداکاری کو سراہتے ہوئے کہا ہے کہ کوہلی بہت قابل اداکار ہیں۔ میڈیا میں یہ خبریں بھی گردش کررہی ہیں کہ کرن اشتہار میں ویرات کی اداکاری سے اتنے زیادہ متاثر ہوئے ہیں کہ وہ انہیں فلم میں کاسٹ کرنا چاہتے ہیں۔ کرن جوہر کی اس خواہش پر فی الحال ویرات کوہلی اور انوشکا شرما کی جانب سے کوئی ردعمل سامنے نہیں آیا ہے۔ تاہم اسٹیڈیم میں چوکے اور چھکے لگانے والے ویرات کوفلموں میں ناچتے، گاتے اوراداکاری کرتے دیکھناان کے مداحوں کے لیےایک خوشگوار تجربہ ہوگا۔
