کراچی(وب ڈیسک)ایڈیشنل آئی جی کراچی غلام نبی میمن کی زیرصدارت منعقد ہونے والے کراچی پولیس کے غیر معمولی اعلیٰ سطحی اجلاس میں کورونا وائرس سے بچاؤ اور سرکاری اقدامات پر عملدرآمد کرانے کے لیے اہم فیصلے کیے گئے۔ترجمان کے مطابق ڈی آئی جی پی ساؤتھ آفس میں منعقد اجلاس میں تمام زونل ڈی آئی جیز، ضلعی ایس ایس پیز و ایس ایس پیز انویسٹیگیشن اور دیگر متعلقہ پولیس افسران نے شرکت کی۔ اجلاس میں کورونا وائرس ایمرجنسی کی صورت میں پولیس کی ذمہ داریوں پر تبادلہ خیال کیا گیا اور اہم فیصلے کیے گئے، اجلاس میں پولیس میں ہر قسم کی چھٹیاں اگلے حکم تک منسوخ کردی گئی ہیں اور انتہائی ایمرجنسی کے سوا کسی کو بھی چھٹی کی اجازت نہیں ہوگی۔ ضلعی ایس ایس پیز ایس تمام پولیس اہلکاروں کی حاضری کو یقینی بنائیں اور ان سے ڈیوٹیاں کروائی جائیں جن کو ٹریننگ سینٹرز نے کرونا وائرس کی ایمرجنسی کی وجہ سے عارضی طور پر اپنے اپنے ضلعوں کو واپس کردیا ہے۔ اجلاس میں فیصلہ کیا گیا کہ کسی بھی امن و امان کی صورتحال سے نمٹنے کے لیے پولیس اسٹیشن کی سطح پرنفری میں اضافہ کیا جائے اور کورونا وائرس ایمرجنسی کے پیش نظر تمام تھانوں کےایس ایچ اوز اپنے اپنے علاقے میں قائم شادی ہالز اور بازاروں کو فوری طور پر بند کروائیں اور خلاف ورزی کی صورت میں قانونی کارروائی عمل میں لائی جائے۔ حکومت سندھ کی جانب سے 22 اسپتالوں میں کورونا وائرس سے متاثرین افراد کے لیے بنائے گئے آئسولیشن وارڈ کے اطراف سیکیورٹی کو یقینی بنایا جائے اور نوجوان پولیس اہکاروں تعینات کیا جائے۔ ضلعی ایس پیز تھانوں میں موجود اینٹی رائیڈ سامان اور آلات کا جائزہ لیں اور کمی کی صورت میں اعلیٰ حکام کو آگاہی دیں۔ اجلاس میں یوٹیلیٹی اسٹورز پر بھی سکیورٹی کا مناسب بندوبست کرنے اور عوام کو روزمرہ استعمال کی اشیاء کی فراہمی یقینی بنانے میں مدد کی ہدایت کی گئی ہے۔ ڈی آئی جی ساؤتھ کو پولیس اسپتال گارڈن میں بھی کوروناوائرس کٹس کا بندوبست کرنے کی ہدایت کی تاکہ ایسے تمام پولیس افسران کا ٹیسٹ کیا جاسکے جن کو کورونا وائرس سے متاثر ہونے کا شبہ ہو، ذخیرہ اندوزی کرنے والوں پر کڑی نگاہ رکھنے اور کراچی پولیس کو کسی بھی ہنگامی صورتحال کے دوران ہر طرح کی مدد کے لیے تیار رہنے کا حکم دیا گیا ہے۔
کورونا وائرس۔۔!! اعلیٰ سطحی غیرمعمولی اجلاس۔۔۔ بڑے افسران کی چھٹیاں منسوخ کر دی گئیں
