حیدرآباد ( نیوز ڈیسک) چیف جسٹس آف پاکستان جسٹس گُلزار احمد کا کہنا ہے خواتین بائیک ضرور چلائیں، مگر دوران سفر باتیں نہ کریں، خواتین کا موٹر سائیکل چلانا ایک اچھا کام ہے۔تفصیلات کے مطابق سندھ ہائی کورٹ بار ایسوسی ایشن اور وومن آن ویل کی جانب سے مشترکہ طور پر خواتین وکلا میں موٹر سائیکل تقسیم کرنے کی تقریب منعقد کی گئی۔تقریب کے مہمان خصوصی چیف جسٹس آف پاکستان جسٹس گلزار احمد تھے جبکہ سندھ ہائی کورٹ کے سینئر ججز، سندھ ہائی کورٹ بار اور کراچی بار کے عہدے داروں سمیت وکلا کی بڑی تعداد نے شرکت کی۔چیف جسٹس نے اپنے خطاب میں کہا کہ جب میں نے سندھ ہائی کورٹ بار کا دعوت نامہ دیکھا تو حیران ہوا کہ خواتین کیسے دو پہیوں پر چلیں گی؟ تاہم خواتین کو بھی موٹر سائیکل چلانی چاہیے یہ ایک اچھا آغاز ہے۔چیف جسٹس یہ بھی کہا کہ میں سمجھتا ہوں کہ موٹر سائیکل چلانا ایک خطرناک کام ہے، خواتین مکمل ٹریننگ کے بعد ہی موٹر سائیکل چلائیں، خواتین کو باتیں کرنے کی عادت ہے مگر موٹرسائیکل چلانے کے دوران باتیں کرنے سے پرہیز کریں۔
