ننکانہ صاحب(محمد قمر عباس )امور کشمیر اور گلگت بلتستان کے وفاقی وزیر چوہدری برجیس طاہر نے کہاہے کہ مسلم لیگ ن ملک کی مقبول ترین جماعت ہے ،گلگت بلتستان کی طرح آزاد کشمیر کے انتخابات بھی بھاری اکثریت سے جیتیں گے ،ضلع ننکانہ صاحب کو مثالی ضلع بنانے کے لئے بھرپور اقدامات کر رہے ہیں ،بہت جلد شاہ کوٹ اور خانقاہ ڈوگراں میں ریسکیو 1122 سروس شروع کر دی جائے گی ان خیالات کا اظہار انہوں نے اپنے دفتر میں صحافیوں سے گفتگو کرتے ہوئے کیا انہوں نے کہا عوام نے عام انتخابات 2013 اور بلدیاتی انتخابات میں مسلم لیگ ن پر بھرپور اعتماد کا اظہار کیا تھا جس کے بعد مسلم لیگ ن کی حکومت نے میاں نواز شریف کی قیادت میں ملک میں ترقی کا سفر شروع کر دیا ،انہوں نے کہا کہ حکومت کی عوام دوست پالیسیوں پر اعتماد کا اظہار کرتے ہوئے لوگوں نے گلگت بلتستان کے انتخابات میں مسلم لیگ ن پر اعتماد کا اظہار کیا تھا ۔چوہدری برجیس طاہر نے کہا کہ آزاد کشمیر میں ہو نے والے انتخابات میں بھی مسلم لیگ ن ریکارڈ کامیابی حاصل کر کے وہاں اپنی حکومت بنائے گی ،انہوں نے مزید کہا کہ ضلع ننکانہ صاحب کا پنجاب کا مثالی ضلع بنانے کے لئے اربوں روپے کے منصوبہ جات پر کام تیزی سے جاری ہے ،سانگلہ ہل میں ریسکیو 1122 سروس کا آغاز ہو گیا ہے جبکہ بہت جلد شاہ کوٹ اور خانقاہ ڈوگراں میں بھی ریسکیو 1122 سروس کا آغاز کر دیا جائے گا
