کیلیفورنیا کے ہنٹنگ ٹن ساحل پر ٹرمپ کے حامی اور مخالف آمنے سامنے آگئے ،دونوں فریقین کے درمیان زبردست دھینگا مشتی ہوئی ،پولیس نے پہلے تو بیچ بچائوکرایا بعد میں جھگڑا کرنے والوں کو دھرلیا۔
ہنٹنگ ٹن ساحل پر ٹرمپ کے حامیوں اور مخالفین کے درمیان گھونسے، ڈنڈے، لاتیں اور آنسو گیس سمیت ہر ہتھیار کا استعمال ہوا۔ ڈونلڈ ٹرمپ کے حامیوں کی ریلی ہو اور جھگڑا نہ ہو ایسا کم ہی دیکھا گیا ہے،یہ ہی ماجرا کیلیفورنیا کےساحل پر ہوا، جہاں امریکی صدر کے حامیوں نے ریلی نکالی،اسی دوران بیچ پر ٹرمپ کی تارکین وطن کے حوالے سے پالیسیوں کے مخالفین پہنچ گئے۔ مظاہرین کا کہنا تھا کہ وہ صدر ٹرمپ کے امریکا میں اختیارات کے بے جا استعمال کو ہر گز برداشت نہیں کریں گے،بات تکرار سے شروع ہوئی، بڑھتے بڑھتے گھونسوں، لاتوں، ڈنڈوں تک جا پہنچی۔ حامیوں نے مظاہرین کو روکنے کی کوشش کی ،تو جوابا مخالفین نے انہیں آنسو گیس کا نشانہ بنایا ، بیچ میں غلطی سے ڈونلڈ ٹرمپ کی خاتون پرستار آگئی، جن کے شوہر نے آو دیکھا نہ تاؤ ہاتھ میں پکڑا جھنڈا دے مارا، جس پر لکھا تھا چلو امریکا کو دوبارہ عظیم بنائیں ۔
بیچ بچاؤ کرانے کے لئے پولیس کو مداخلت کرنا پڑی، جھگڑا کرنے والوں میں سے 4 کو دھر لیا،امریکی ریاست کیلیفورنیا کو سیاسی وابستگی کے حوالے سے بلیو اسٹیٹ کہا جاتا ہے جہاں ڈیموکریٹ حمایتیوں کی اکثریت ہے۔
