ویسٹ انڈیز کرکٹ بورڈ کے اعلیٰ حکام کو سینٹرل کنٹریکٹ کے معاملے پر تنقید کا نشانہ بنانے والے تجربہ کار بلے باز ڈیرن براوو کو سہہ فریقی سیریز کے لیے ٹیم سے باہر کردیا گیا۔
27 سالہ براوو کو زمبابوے میں میزبان اور سری لنکا کے ساتھ شروع ہونے والی سہ فریقی سیریز سے واپس بلا کر جیسن محمد کو ٹیم میں شامل کرلیا گیا ہے۔
ویسٹ انڈیز کرکٹ بورڈ نے ڈیرن براوو کو سینڑل کنٹرکٹ میں سی کیٹگری میں رکھا تھا جس پر انھوں نے احتجاج کرتے ہوئے بورڈ کے صدر سے مستعفی ہونے کا مطالبہ کیا تھا۔
براوو نے اپنے ٹویٹ میں بورڈ کے سربراہ ڈیو کیمرون کو آڑھے ہاتھوں لیتے ہوئے کہا تھا کہ ‘آپ گزشتہ چار سالوں سے ناکام ہورہے ہیں اور آپ مستعفی کیوں نہیں ہورہے ہیں’۔
ویسٹ انڈیز کرکٹ بورڈ کے ترجمان نے کہا کہ بورڈ نے ‘براوو کو ان کے خراب رویے کے باعث ٹیم سے باہر کیا گیا ہے کیونکہ انھوں نے اپنے کنٹریکٹ کے حوالے سے بورڈ پر تنقید کی تھی’ اور ان کی جگہ جیسن محمد کو شامل کیا گیا ہے۔
براوو نے اب تک ویسٹ انڈیز کی جانب سے 95 ایک روزہ میچز کھیلے ہیں اور 2ہزار 595 رنز بنا چکے ہیں۔
دوسری جانب آل راؤنڈرجیسن محمد نے حال ہی میں اے ٹیم کی قیادت کرتے ہوئے سری لنکا اے کو سیریز میں 0-3 سے شکست دینے میں اہم کردار ادا کیا تھا جہاں انھوں نے بالترتیب 105، 58 اور 14 رنز کی اننگز کھیلی تھی۔
ویسٹ انڈیز کرکٹ بورڈ کے ترجمان نے مزید کہا کہ آف اسپنر سنیل نرائن نے ذاتی وجوہات کے باعث سیریز سے دست برداری کا فیصلہ کیا جس کے بعد دیوندرا بشو کو اسکواڈ میں شامل کیا گیا ہے۔
ویسٹ انڈیز، زمبابوے اور سری لنکا کے درمیان سہہ فریقی سیریز کا آغاز 14 نومبر کو ہوگا اور 27 نومبر تک یہ سیریز جاری رہے گی۔
