ممبئی ……بالی ووڈ فلم انڈسٹری کے مشہور اداکاراورلاکھوں مداحوں کے دلوں پر راج کرنے والے ریتک روشن نے زندگی کی42 بہاریں دیکھ لی۔10جنوری1974ء کو بھارتی ریاست مہارشٹرا کے شہر ممبئی میں ایک فلمی گھرانے میں پیدا ہونے والے ریتک روشن نے 1980ء میں پہلی بار صرف6سال کی عمر میں فلم Aashaمیں چائلڈ ایکٹر کی حیثیت سے کام کیا جبکہ بطور ہیرو2000ء میں فلم کہو نا پیار ہے سے کیئریئر کا آغازکیا۔پہلی ہی فلم میں متاثر کن اداکاری پرریتک کو نہ صرف فلم فیئر کے بیسٹ میل ڈیبیو بلکہ بہترین اداکار کے ایوارڈ کا بھی حقدار ٹھہرایا گیا۔کہو نا پیار ہے میں شاندار کردار نگاری کا مظاہرہ کرنےکے بعد ریتک نے پیچھے مْڑ کر نہیں دیکھا اور مشن کشمیر،لکشیا،کبھی خوشی کبھی غم، دھوم 2، کرش، کوئی مل گیا، جودھا اکبر، گزارش، زندگی نہ ملیگی دوبارہ، اگنی پتھ اور کرش تھری جیسی کامیاب فلمیں دیتے ہوئے کئی ایوارڈز اپنے نام کیے۔2011۔12 میں ایشیا کے سب سے پرکشش مرد کا خطاب حاصل کرنے والے ریتک روشن کا مومی مجسمہ لندن اورواشنگٹن کے مادام تساؤ میوزیم کی زینت بنایا جاچکا ہے۔2014 میں ریلیز ہونے والی ان کی فلم بینگ بینگ دنیا بھر میں ایک ساتھ5 ہزار ایک سو سینما ئوں میں نمائش کیلئے پیش کی گئی۔بینگ بینگ نے صرف بھارت میں اپنے ابتدائی گیارہ دنوں میں باکس آفس پر 150 کروڑ روپے سے زیادہ کا بزنس کر کے سب کو حیران کیا جبکہ اس کی مجموعی آمدنی 300 کروڑ سے بھی تجاوز کر گئی۔ریتک روشن کی آنے والی فلم موہنجودڑو ہے جس کے ڈائریکٹر اشوتوش گواریکر ہیں اور اس فلم میں ساؤتھ انڈین فلموں کی اداکارہ پوجا ہیج ہیروئین کا کردار رہی ہیں،یہ فلم رواں برس 12 اگست کو سینما گھروں میں پیش کر دی جائے گی۔
