بلوچستان (یس ڈیسک) وزیراعلیٰ بلوچستان ثنا اللہ زہری کہتے ہیں کہ ہم محب وطن اور اپنے وطن کے وارث ہیں کوئی مائی کالعل بلوچستان کو پاکستان سے الگ نہیں کرسکتا۔
زیارت میں یوم آزادی کے موقع پر پرچم کشائی کی تقریب سے خطاب کرتے ہوئے ثنا اللہ زہری کا کہنا تھا کہ دہشت گردی کی جنگ کو ادھورا نہیں چھوڑنا چاہئے، بہادر قومیں سانحات کا مقابلہ کرتی ہیں، دہشت گردوں کو ہم زیادہ کاری ضرب لگائیں گے، اب دہشت گردوں کو وار کرنے سے پہلے ہی ٹھکانے لگادیں گے، دہشت گردی کے خلاف جنگ میں ہم حق پر ہیں اس لئے ہم ضرور جیتیں گے اور دہشت گردوں سے اگلے قدموں پر لڑتے رہیں گے۔
وزیر اعلیٰ بلوچستان نے کہا کہ ہم محب وطن اور اپنے وطن کے وارث ہیں۔ کوئٹہ میں دہشت گردی کے باوجود خوف نہیں، کشمیر اوربلوچستان کے مسائل کی نوعیت الگ الگ ہے، بلوچستان کے وارث ہم ہیں مودی نہیں، ہم سو مرتبہ پیدا ہوکر سو مرتبہ بھی اپنے وطن پر قربان ہوں تو بھی کوئی غم نہیں۔ انہوں نے کہا کہ باہر بیٹھے لوگ آکر پاکستان کی سیاست کریں اور پہاڑوں پرچھپے لوگ آکر قومی دھارے میں شامل ہوجائیں، بندوق اٹھانے والے بھی الیکشن لڑ کر اپنی اہمیت کا اندازہ کرلیں۔
ثنا اللہ زہری ہر آزاد ملک کو ترقی کرنے کا حق ہے، پاک چین اقتصادی راہ داری اغیار کی آنکھوں میں کھٹک رہی ہے لیکن ہم اپنی جانوں پر کھیل کر اقتصادی راہداری کی حفاظت کریں گے۔
دریں اثنا قائد اعظم ریزیڈنسی میں جشن آزادی کی تقریب سے خطاب کرتے ہوئے کمانڈر سدرن کمانڈ لیفٹیننٹ جنرل عامر ریاض کا کہنا تھا کہ آزادی ایک بڑا خاص تحفہ ہے ہمارے اکابرین نے پاکستان بنایا اور ہم آج یہاں آزادی سے سانس لے رہے ہیں۔ہر پاکستانی کے خون کا پورا پورا حساب لیا جائےگا دشمن نے ہمیں تکلیف اوردکھ دیا، لیکن وہ ہمارا اتحاد نہیں توڑ سکتا۔ دشمن نے ہمیں دکھ ضرور پہنچایامگر وہ ہمارا دل اور جذبہ توڑ نہیں سکا جنہوں نے بندوق اٹھائی اگر آج وہ واپس آنا چاہتے ہیں تو آجائیں۔
