ایک طرف جہاں متعدد پاکستانی ستارے بولی وڈ میں اپنی قسمت آزمانے میں مصروف ہیں وہیں بولی وڈ کے معروف اداکار اوم پوری ہندوستان کے بجائے پاکستان میں اپنے ساتھی اداکار فہد مصطفیٰ کے ساتھ بہترین وقت گزار رہے ہیں۔
اوم پوری پہلی مرتبہ پاکستانی فلم ’ایکٹر ان لا‘ میں کام کرتے نظر آئیں گے اور بقیہ کاسٹ کے ساتھ فلم کی پروموشنز کے دوران انھیں دیکھ کر اندازہ لگایا جاسکتا ہے کہ بولی وڈ اداکار کو فلم کی شوٹنگ کے دوران بھی کافی مزہ آیا ہوگا۔
http://www.dailymotion.com/video/x4rsc0s
فلم ’ایکٹر ان لا‘ میں فہد مصطفیٰ اور مہوش حیات خان مرکزی کردار ادا کرتی نظر آئیں گی۔
حال ہی میں فہد مصطفیٰ نے اپنے انسٹاگرام اکاؤنٹ پر ایک ویڈیو شیئر کی جس میں وہ اوم پوری کے ساتھ ’ایکٹر ان لا‘ کے ٹائٹل سانگ پر رقص کرتے نظر آئے۔
فہد کا اس ویڈیو کے حوالے سے کہنا تھا کہ یہ فلم کی پہلی ڈب میش ویڈیو ہے۔
واضح رہے کہ ’ایکٹر ان لا‘ کی کہانی ایک ایسے نوجوان کے گرد گھومتی ہے جو وکیل کے بجائے اداکار بننے کی خواہش رکھتا ہے تاہم اس کے والد اسے وکیل بننے پر مجبور کرتے ہیں۔
نبیل قریشی کی ہدایات میں بننے والی فلم رواں سال عید الضحیٰ پر نمائش کے لیے پیش کی
جائے گی۔
فلم میں ایک گانا عاطف اسلم نے گایا ہے جس کا کہ مائیکل جیکسن کےساتھ خاص تعلق ہے عاطف اسلم کے مطابق یہ گانا انہیں کافی مختلف لگا اور اس کی نئی دھن اور الفاظ نے انہیں کافی متاثر کیا، انھوں نے بتایا کہ گانے میں کچھ ایسے فیچرز بھی موجود تھے جو مائیکل جیکسن اپنے گانے میں استعمال کرتے تھے، انہوں نے کہا کہ اس کی ویڈیو کافی اچھی ہے اور فضہ کے ساتھ کام کرنا بہترین تجربہ تھا۔
