سیالکوٹ(ویب ڈیسک) مشیر اطلاعات فردوس عاشق اعوان نے کہاہے کہ دوٹکے کے لوگ ٹاک شوز میں بیٹھ کر کہتے ہیں کہ حکومت ناکام ہوگئی ہے ،وزیر اعظم ملک کوفرسودہ نظام سے نجات دلائیں گے ۔تفصیلات کے مطابق سیالکوٹ میں جلسہ سے خطاب کرتے ہوئے فردوس عاشق اعوان نے کہا کہ دوٹکے کے لوگ ٹاک شوز میں بیٹھ کر کہتے ہیں کہ حکومت ناکام ہوگئی ہے ، پچھلے دس سال کے دوران پنجاب حکومت صوبے کے عوام پر عذاب بن کرنازل ہوئی ۔ وزیر اعظم عمران خان کشمیریوں کا مقدمہ لڑنے کیلئے امریکہ گئے ہیں ، پاکستان کو اس وقت سیاسی استحکام کی ضرورت ہے ۔فردوس عاشق اعوان کا کہنا تھا کہ وزیراعظم فرسودہ نظام سے ملک کونجات دلائیں گے،ہمیں سب سے پہلے اپنی سوچ کوبدلناہوگا،جن کوگھروالے نہیں جانتے وہ کہتے ہیں کہ حکومت ناکام ہوگئی ہے۔انہوں نے کہا کہ وزیراعظم نے ملک کی تقدیربدلنے کاوعدہ کیاہے۔ وزیر اعظم جنرل اسمبلی میں کشمیریوں کا مقدمہ لڑیں گے ۔ ایک طرف وزیر اعظم ملک کی آزادی کیلئے بے چین ہیں تو ایک طرف مولانا فضل الرحمان 22نمبر بنگلے کے لئے بے چین ہیں۔ایک طرف یہ ٹولہ چوروں کی آزادی کیلئے چندہ اکھٹاکررہاہے ۔ انہوں نے کہا کہ خود کوجمہوریت کا چیمپین کہنے والے خورشید شاہ آج نیب کے شکنجے میں ہیں، تاریخ میں پہلی بار جیبیں بھرنے کی بجائے خزانہ بھرا جارہاہے ۔دوسری جانب ایک خبر کے مطابق صدر مملکت ڈاکٹر عارف علوی نے کہا ہے کہ مولانا فضل الرحمن ملنا چاہیں گے تو انکار نہیں کروں گا، صدر پاکستان کی بھاری ذمہ داری کا بہت زیادہ بوجھ محسوس کرتا ہوں۔وزیراعظم عمران خان سے روزانہ کسی نہ کسی بات پر مشورہ ہوتا ہے، صدر کا عہدہ سیاسی ہے مگر ان معنوں میں غیر سیاسی ہے کہ صدر کا سیاسی جھکاؤ نہ ہو، مجھ میں سے تحریک انصاف نہیں نکل سکتی لیکن بطور صدر غیرجانبدار ہوں۔جیو نیوز کے پروگرام ”ایک دن جیو کے ساتھ“ میں میزبان سہیل وڑائچ سے گفتگو کرتے ہوئے انہوں نے کہا کہ اٹھارہویں ترمیم میں بھی بہتری کا ہمیشہ امکان ہے۔معیشت نے استحکام کا سفر شروع کردیا ہے، دو تین مہینوں میں بہتری کے اشارے ملنا شروع ہوجائیں گے، آرٹیکل 149کے نفاذ سے فیڈریشن اور سندھ حکومت کے تعلقات خراب ہوں گے۔کراچی سندھ کا حصہ ہے اور حصہ رہنا چاہئے۔
