ممبئی (ویب ڈیسک ) بولی وڈ اداکارہ عالیہ بھٹ کا شمار آج ہندی سینما کی سب سے کامیاب اور بہترین اداکاراؤں میں کیا جاتا ہے جو ہر فلم ساز کی پسند بنتی جارہی ہیں۔سب ہی جانتے ہیں کہ عالیہ بھٹ آج جس مقام پر موجود ہیں۔ انہیں یہاں تک پہنچانے میں سب سے بڑا ہاتھ بولی وڈ ہدایت کار کرن جوہر کا ہے۔ جنہوں نے سب سے پہلے عالیہ بھٹ کو اپنی 2012 کی فلم ’اسٹوڈنٹ آف دی ایئر میں کاسٹ کیا۔اسٹوڈنٹ آف دی ایئر کے بعد عالیہ بھٹ کرن جوہر کی کئی فلموں کا حصہ بنیں اور اب وہ بہت جلد کرن جوہر کی فلم ’تخت‘ میں کام کرتی نظر آئیں گی، جس کی ہدایات اور پروڈکشن دونوں کرن جوہر کررہے ہیں۔فلم ’تخت‘ کی شوٹنگ کا آغاز رواں سال ہوگا، جس میں بولی وڈ کے کئی نامور اداکار موجود ہیں۔فلم کی کاسٹ میں رنویر سنگھ، کرینہ کپور خان، عالیہ بھٹ، جھانوی کپور، ویکی کوشل، بھومی پڈنیکر اور انیل کپور موجود ہیں۔لیکن کیا آپ جانتے ہیں کہ عالیہ بھٹ کو فلم ’تخت‘ کی کہانی تک کا معلوم نہیں تھا، اس کے باوجود انہوں نے فلم میں کام کرنے کی حامی دے دی۔ہندوستان ٹائمز کی رپورٹ کے مطابق عالیہ بھٹ نے انکشاف کیا کہ انہیں خود اس فلم کی کہانی کا اس وقت معلوم ہوا جب انہوں نے فلم سے متعلق میڈیا رپورٹس پڑھیں اور اس وقت تک وہ فلم سائن کرچکی تھیں۔اداکارہ نے کہا کہ ’مجھے کرن جوہر نے صرف ایک کال کی، ایمانداری سے بات کی جائے تو مجھے تخت کے بارے میں کچھ بھی معلوم نہیں تھا، کرن جوہر نے فون پر کہا کہ وہ یہ فلم بنارہے ہیں اور مجھے اس کا حصہ بننا ہوگا، اور میں نے ہاں کردی‘۔ عالیہ کے مطابق ’کئی روز بعد اپنی فلم براہمسٹرا کی شوٹنگ کے دوران میں نے کرن سے پوچھا کہ اب تو بتادو کہ میں فلم میں کر کیا رہی ہوں؟ لیکن ایسا میں صرف کرن جوہر کے ساتھ کر سکتی ہوں، کیوں کہ ان پر میں آنکھیں بند کرکے بھروسہ کرسکتی ہوں‘۔اداکارہ نے کہا کہ ’میں کرن سے اتنی قریب ہوں کہ اگر میں کچھ کر بھی رہی ہوں گی، تو ان کے ساتھ کام کرنے کے لیے اسے چھوڑ دوں گی، میں کرن جوہر سے بےحد پیار کرتی ہوں اور یہ فلم بھی ان کی ہی خاطر کررہی ہوں‘۔یاد رہے کہ کرن جوہر نے آخری مرتبہ اپنی 2016 کی فلم ’اے دل ہے مشکل‘ کی ہدایات دی تھی۔فلم ’تخت‘ سال 2020 میں ریلیز ہوگی۔
، عالیہ بھٹ کونسی فلم میں کام کرنے جا رہی ہیں ؟
