پیرس 15 ستمبر:2019 یوم دفاع اور یوم شہدا کی یاد میں ایک پروقار تقریب کا انعقاد کیا گیا جسے فرانس میں مقیم پاکستانی و کشمیری برادری نے مقبوضہ جموں و کشمیر کے مظلوم عوام کے ساتھ اظہار یکجہتی کے طور پرمنایا۔
اس تقریب کا انعقاد آج پیرس کے نواحی علاقے میں کیا گیا جہاں فرانس میں مقیم پاکستانی و کشمیری برادری نے بڑی تعداد میں 1965 کی جنگ کے شہدا کو دلی تعزیت پیش کرتے ہوئے اپنے کشمیری بھائیوں اور بہنوں کے ساتھ اظہار یکجہتی کیا جہاں چالیس دن سے بھارتی سکیورٹی فورسز کی جانب سے ان پر لگائے گئے سخت کرفیو کی وجہ سے وہ بغیر خوراک، ادوایات اور آزادی کے اپنے گھروں میں محسور ہیں۔
اس موقع ڈپٹی ہیڈ آف مشن جناب امجد عزیز قاضی نے اپنا اظہار خیال پیش کرتے ہوئے پاکستان کی بہادر مسلح افواج کو زبردست خراج تحسین پیش کیا جنہوں نے اپنے مادر وطن کی سرحدوں کی حفاظت کرتے ہوئے اپنی جانوں کا نذرانہ پیش کیا اور اپنے دشمنوں کے مذموم عزائم کو شکست فاش دے کر اپنے پیارے وطن عزیز کی سرحدوں کو محفوظ رکھا۔
انہوں نے پاکستان کی جانب سے کشمیریوں کی غیر متزلزل اور اٹل حمایت کا اظہار کرتے ہوئے انہیں یقین دلایا کہ پاکستان کشمیر کی حق خودارادیت کے اس جدوجہد کے حصول کیلئے اپنی سیاسی، سفارتی اور اخلاقی حمایت جاری رکھے گا۔
فرانس میں پاکستانی و کشمیری جماعتوں کے رہنماؤں نے اپنے اپنے اظہار خیال میں پاکستان کی بہادر افواج کو شاندار خراج تحسین پیش کیا اورمادر ملت کے وجود کو پیش آنے والے کسی بھی خطرے سے نمٹنے کیلئے ان کی پیشہ ورانہ صلاحیت اور قابلیت پر مکمل اعتماد کا اظہار کیا۔
انہوں نے مقبوضہ کشمیر کی پندرہ ملین عوام کے ساتھ بھی اپنی حمایت اور ہمدردی کا اظہار کیا جنہیں بھارتی مسلح سکیورٹی افواج کی جانب سے انتہائی ناروا سلوک کا سامنا ہے اور وہاں گزشتہ چالیس روز کے کرفیوں کی وجہ سے لوگ اپنے گھروں میں محسور ہیں جنہیں خوراک، ادویات اور شخصی آزادی سے محروم رکھا جا رہا ہے۔
انہوں نے اس عزم کا بھی اظہار کیا کہ وہ فرانس میں اپنی آواز بلند کرتے رہیں گے اور انہوں نے فرانس اور بین الاقوامی برادری سے مطالبہ کیا کہ وہ مقبوضہ جموں و کشمیر میں ہونے والے سنگین انسانی بحران کو ختم کرنے کیلئے اپنا بھرپور کردار ادا کریں۔
