پاکستان ہم سب کا ہے، مل کر اسے توانا بنانا ہے، پاکستان کا مستقبل تابناک ہے، شہباز شریف

پاکستان ہم سب کا ہے، مل کر اسے توانا بنانا ہے.پاکستان کا مستقبل تابناک ہے، شہباز شریف
اسلام آباد: (اصغر علی مبارک) وزیراعلیٰ پنجاب محمد شہبازشریف نے کہا ہے کہ پاکستان ہم سب کا ہے، مل کر اسے توانا بنانا ہے، روشن پاکستان کا مستقبل نئی نسل کی جدوجہد سے وابستہ ہے صوبے کے 20 لاکھ نوجوانوں کو ہنرمند بنایا جائے گا، سکل ڈویلپمنٹ پروگرام کے تحت لاکھوں نوجوان باعزت روزگار کما رہے ہیں نوجوان نسل کی تعلیم و تربیت کیلئے وسائل میں کمی نہیں آنے دیں گے‘ وزیراعلیٰ پنجاب نے نوجوانوں کے وفد سے گفتگومیں کہا ہے کہ روشن پاکستان کا مستقبل نئی نسل کی جدوجہد سے وابستہ ہے، ترقی و خوشحالی کی جانب بڑھ رہے ہیں، پاکستان ہم سب کا ہے اور مل کر اسے توانا و خوشحال بنانا ہے، ملک کی ترقی کے لئے محنت، دیانت اور امانت کو شعار بنانا ہوگا، پنجاب میں تعلیمی شعبہ کی ترقی کے لئے انقلابی اقدامات کے خاطرخواہ نتائج سامنے آ رہے ہیں، سکولوں میں انرولمنٹ میں اضافے اور فروغ تعلیم کے لئے پائیدار اقدامات کئے گئے ہیں۔ لندن سے آمدہ اطلاعا ت کے مطابق وزیراعلیٰ محمد شہبازشریف نے نوجوانوں کے وفد سے گفتگو کرتے ہوئے کہا کہ نوجوانوں کو جدید علوم سے آراستہ کئے بغیر ترقی کا خواب شرمندہ تعبیر نہیں ہوسکتا۔ صوبے میں جدید علوم اور انفارمیشن ٹیکنالوجی کے فروغ کے جامع پروگرام پر عمل پیرا ہیں۔ پنجاب ایجوکیشنل انڈومنٹ فنڈ کے ذریعے پنجاب کے ہر مستحق اور ہونہار طالب علم کیلئے اعلیٰ تعلیم کا حصول ممکن بنایا گیا ہے۔انہوں نے کہا کہ خوشحالی کا سفر نوجوانوں کو ترقی کا انجن بنا کر ہی طے کیا جاسکتا ہے۔ حکومت نے نوجوانوں کی ترقی اور انہیں با اختیار بنانے کیلئے بے مثال پروگرام شروع کئے ہیں۔قوم کے تابناک مستقبل کیلئے نوجوانوں کو جدید علوم سے آراستہ کرنے پر اربوں روپے کی سرمایہ کاری کی گئی ہے۔ طلباء و طالبات پاکستان اور چین کے اعلیٰ تعلیمی اداروں میں چینی زبان سیکھ رہے ہیں جبکہ ترکش زبان کے کورس کیلئے طلباء کو ترکی بھجوایا گیا ہے۔وزیراعلیٰ نے کہا کہ صوبے کے 20 لاکھ نوجوانو ںکو ہنرمند بنانے کے ہدف کی جانب سے تیزی سے بڑھ رہے ہیں اور پنجاب سکل ڈویلپمنٹ پروگرام کے تحت اب تک لاکھوں نوجوان باعزت روزگار کما رہے ہیں۔ انہوں نے کہا کہ میرٹ ہی ترقی اور آگے بڑھنے کا واحد راستہ ہے اور ترقی کے تمام پروگراموں میں میرٹ کو اولیت دی گئی ہے۔ اداروں میں میرٹ کے ذریعے باصلاحیت اور اہل افراد کو بھرتی کیا گیا ہے۔
انہوں نے کہا کہ تعلیمی شعبہ کی بہتری کیلئے کئے گئے اقدامات کے مثبت نتائج برآمد ہوئے ہیں۔ نوجوان نسل کی تعلیم و تربیت کیلئے وسائل کی فراہمی میں کمی نہیں آنے دی جائے گی۔ وزیراعلیٰ نے کہا کہ ہم نے ہمیشہ عوام کی خدمت کو اپنا نصب العین بنایا اور ہمارا ماضی اور حال عوامی خدمت اور ملک کی ترقی کے اقدامات سے عبارت ہے۔