شیخوپورہ(بیورورپورٹ)سابق رکن صوبائی اسمبلی میاں خالد محمودنے کہا ہے کہ رمضان المبارک اللہ تعالیٰ کی رحمتوں ،برکتوں اور کائنات کے خالق سے استغفار، توبہ ، مناجات اور اللہ کو راضی کرنے کا مہینہ ہے رمضان المبارک مسلمانوں کے پاس اپنے رب کو راضی کرنے کا مہینہ ہے۔ یہ اللہ تعالیٰ کی میزبانی کا مہینہ ہے ، جس میں روزہ دار مہمان ہوتا ہے۔ رمضان المبارک میں روزہ رکھنے سے بھو ک پیا س انسان کو دوسروں کی بھوک اور پیا س کا احساس دلاتی ہے، اس ماہ میں اجتماعی عبادات کا حکم ہے۔انسان معاشرے کے محروم طبقات کا خیا ل رکھے۔ فقیروں ، مسکینوں ، ناداراور غریبوں کا احساس کرے۔ اسی لئے ماہ مقدس کے آخری عشرے میں فطرہ ادا کرنے کی ہدایت کی گئی ہے۔تاکہ مستحقین کو بھی خوشیوں میں شامل کریں۔اور ان کی ضروریات کا خیال رکھیں۔اپنے ایک بیان میں میاں خالد محمود نے کہا کہ اللہ کا مہمان مہینہ امت مسلمہ سے صبر و استقامت،ایثار اور تقویٰ کا متقاضی ہے ۔ ہر کلمہ گو مسلمان رمضان المبارک کا ایمانی جوش و خروش کے ساتھ استقبال کرے ۔اللہ کو راضی کرنے اور مغفرت کی ان انمول گھڑیوں سے امت محمدیہ زیادہ سے زیادہ فائدہ اٹھائے ۔ رمضان المبارک اسلامی بھائی چارے کے فروغ اور اسلامی ثقافت کے پرچار کا عظیم مہینہ ہے۔یہی ماہ مقدس ہے جو امت مسلمہ کو اتحاد اور یکجہتی کی ایک لڑی میں پرو دیتا ہے ۔انہوں نے کہاکہ رمضان المبارک کی ایک فضلیت اس میں قرآن پاک کا نزول ہے جبکہ اسلامیان پاکستان کے نزدیک اس ماہ مقدس کی اہمیت اس لئے بھی دو چند ہے کہ پاکستان کو اس ماہ مقدس میں آزادی ملی ۔انہوں نے کہاکہ قوم پاکستان کی سلامتی،خوشحالی کیلئے دعا کرے ۔انہوں نے کہاکہ دوکاندار،تاجر اس ماہ مقدس میں ناجائز منافع خوری ترک کر کے اللہ کی رحمت اور اس مہینے کی برکتوں کے حق دار بنیں۔انہوں نے کہاکہ رمضان المبارک امسال شدید گرمی کے موسم میں آیا ہے لہذا افطار و سحر اور تراویح کے دوران لوڈ شیڈنگ نہ کی جائے ،صرف اعلانات نہ کئے جائیں بلکہ عمل بھی کیا جائے۔
