شکر الحمدللہ ۔ اللہ کریم نے پاک سرزمین کی لاج رکھی، پوری دنیا سمیت بھارتی عوام بھی وزیراعظم پاکستان کی ممنون، ملک انصر
پیرس (نمائندہ خصوصی) تحریک انصاف فرانس کے مرکزی راہنما ملک انصر خان نے اللہ کریم کے حضور شکریہ کلمات کے ساتھ کہا ہے کہ اللہ کریم کا شکر ہے جس نے پاک سرزمین کو سربلندی عطا کی ۔ اس کیلئے ہم اللہ کریم کا جتنا شکر ادا کریں کم ہے۔ انہوں نے کہا کہ وزیراعظم عمران خان کی جانب سے پاکستان کے زیر حراست بھارتی ائیر فورس کے پائلٹ کی واپسی کے اعلان پر نہ صرف پوری دنیا نے سراہا ہے بلکہ بھارت کے اندر سے بھی اس قابل رشک اعلان پر تعریفی پیغامات سامنے آئے ۔
واضح رہے کہ آج پارلیمنٹ کے مشترکہ اجلاس میں پاکستان نے ایک مرتبہ پھر بھارت کو امن کا پیغام دیا اور وزیراعظم عمران خان نے جذبہ خیرسگالی کے تحت بھارتی پائلٹ کو کل رہا کرنے کا اعلان کر دیا ۔وزیر اعظم کی جانب سے اس اعلان پر اقوام عالم کی معتبر شخصیات سمیت ہندوستانی عوام نے بھی کھل کر مائیکرو بلاگنگ ویب سائٹ ٹوئٹر پر ردعمل دیا ۔انہوں نے وزیرا عظم عمران خان کا اعلان شیئر کرتے ہوئے تعریفی کلمات لکھ کر اپنی خوشی کا اظہار کیا اور اس اقدام کو سراہا ۔
