کوئٹہ سمیت بلوچستان کے شمالی علاقوں میں سردی کی شدت میں اضافہ ہوگیا۔ کوئٹہ میں کم سے کم درجہ حرارت منفی5 ڈگری سینٹی گریڈ ریکارڈکیا گیا، گلگت بلتستان کے پہاڑوں پر برف باری نے موسم مزید سرد کردیا جبکہ چترال میں لواری ٹاپ ٹریفک کے لیے کھول دیا گیا ہے۔
محکمہ موسمیات کے مطابق کوئٹہ میں کم سے کم درجہ حرارت منفی 5ڈگری سینٹی گریڈ ریکارڈ کیا گیا ہے، یہ رواں موسم سرما میں کم سے کم درجہ حرارت ہے،وادی کی فضا میں خشکی بھی ہے۔گھروں سے نکلنے والے افراد سردی کی شدت سے بچنے کے لئے لوگ گرم کپڑوں کا استعمال کررہے ہیں جبکہ مزدور طبقہ لکڑیاں جلا کر اپنے ہاتھ سینکتےدکھائی دیتے ہیں۔محکمہ موسمیات کے مطابق آئندہ چوبیس گھنٹوں میں کوئٹہ میں موسم سرد اور خشک رہنے کا امکان ہے۔ادھر قصور، ٹوبہ ٹیک سنگھ اور پنجاب کے مختلف علاقوں میں دھند کے باعث معمولات زندگی متاثر ہوئے ہیں جبکہ لاہور میں دھند چھٹنے کے بعد موٹروے ٹریفک کے لیے کھول دیا گیا تاہم ڈرائیورز کو احتیاط کی ہدایت کی گئی ہے
