راولپنڈی(ویب ڈیسک) سابق وفاقی وزیر داخلہ چودھری نثار کی طبیعت ناساز ہو گئی جس پرانہیں راولپنڈی انسٹی ٹیوٹ آف کارڈیالوجی منتقل کر دیا گیا ۔ نجی ٹی وی 24 نیوز کے مطابق سابق وفاقی وزیر چودھری نثار کی طبیعت اچانک بگڑ گئی ،جس پر انہیں فوری راولپنڈی انسٹی ٹیوٹ آف کارڈیالوجی منتقل کر دیا گیا جہاں ان کے ضروری میڈیکل ٹیسٹ لئے جائیں گے ۔ یاد رہے کہ چند روز قبل اپنے ایک پیغام میں سابق وفاقی وزیر داخلہ چودھری نثار نے کہا تھا کہ کار ڈرائیورکو پائلٹ سیٹ پر بٹھانے والے صورتحال کے خود ذمہ دار ہیں، بہت سے رازوں سے آگاہ ہوں سچ بول دیا تو سب کو حیران کردوں گا، آج کے حالات 1970ء سے بھی زیادہ بد تر ہیں، ہم اندرونی وبیرونی سازشوں کا شکار ہیں۔ سیاستدان حالات پرکبوترکی طرح آنکھیں بند کیے ہوئے ہیں۔ میڈیا رپورٹس کے مطابق سابق وفاقی وزیر داخلہ چودھری نثار نے کلر سیداں میں کارکنوں سے گفتگو کرتے ہوئے کہا کہ اقتدارمیری منزل نہیں ہے۔ اپنے ضمیراور خمیر کا سودا کرکے عوام کے ساتھ بے وفائی نہیں کرسکتا۔ چاہتا توآج بھی اپنی گاڑی پر کسی وزارت کا جھنڈا لہرا سکتا تھا۔ چوہدری نثار نے خبردار کیا کہ آج کے حالات 1970 سے بھی زیادہ بد تر ہیں۔
