اسلام آباد( نیوز ڈیسک ) وفاقی وزیر سائنس و ٹیکنالوجی فواد چوہدری نے ٹوئٹر پر جمعیت علمائے اسلام سے منسوب ایک جعلی نوٹی فکیشن ٹوئٹ کرکے نیا تنازع کھڑا کردیا ہے۔ سوشل میڈیا صارفین نے فواد چوہدری کے خلاف سائبر کرائم ایکٹ کے تحت مقدمہ درج کرنے کا مطالبہ کیا ہے۔
گزشتہ کئی دنوں سے سوشل میڈیا پر ایک نوٹی فکیشن گردش کر رہا ہے جو جمعیت علمائے اسلام سے منسوب کیا جارہا ہے۔ نوٹی فکیشن میں 27 اکتوبر کے آزادی مارچ کے حوالے سے کارکنان کے لیے ہدایات لکھی گئی ہیں۔ جمعیت علمائے اسلام کا سوشل میڈیا سیل متعدد مرتبہ اس نوٹی فکیشن کو جعلی قرار دے چکا ہے۔دس نکات پر مشتمل اس نوٹی فکیشن کا 6 نمبر نکتہ انتہائی غیر شائستہ ہے اور فواد چوہدری نے بھی اسی کا حوالہ دیتے ہوئے لکھا ہے کہ ’’چھ نمبر ہدائت سے تو لگ رہا ہے دھرنا ایمسٹر ڈیم یا سان فرانسسکو کی پنک موومنٹ کا دھرنا ہے۔ کمال ہی ارادے ہیں۔‘‘فواد چوہدری کے اسی ٹوئٹ کے جواب میں جمعیت علمائے اسلام کے آفیشل ٹوئٹر اکاؤنٹ نے کہا ہے کہ مذکورہ نوٹی فکیشن جعلی ہے جے یو آئی کے آفیشل اکاؤنٹ سے جاری کے مطابق ’’آزادی مارچ کی عوامی حلقوں میں مقبولیت اور تمام شعبوں سے وابستہ افراد کی بھرپور حمایت پر چند عناصر جھوٹ اور فیک چیزیں چلا کر خود کو طفل تسلیاں دے رہے ہیں‘‘۔آفیشل اکاؤنٹ سے مزید کہا گیا ہے کہ ایسے عناصر (فوادی چوہدری) سے ہوشیار رہیں۔ ہمارے اہداف متعین ہیں۔ باوثوق خبر اور نوٹیفکیشن کیلئے جماعت کے مرکزی اکاؤنٹس سے وابستہ رہیں۔صحافی مبشر زیدی نے فواد چوہدری کے ٹوئٹ کا حوالہ دیتے ہوئے کہا کہ ’فیک نیوز بسٹر‘ اب کدھر غائب ہے۔ یاد رہے کہ فیک نیوز بسٹر فواد چوہدری نے اس وقت بنایا تھا جب وہ وزیر اطلاعات تھے اور فواد چوہدری اس پر مبینہ جعلی خبریں شیئر کرتے اور ایسی خبریں پھیلانے والوں کے خلاف قانونی کارروائی کی وارننگ دیا کرتے تھے۔سوشل میڈیا صارفین نے جعلی نوٹی فکیشن پھیلانے پر فوادی چوہدری کے خلاف سائبر کرائم ایکٹ کے تحت مقدمہ درج کرنے کا مطالبہ کیا ہے۔
