چین کے سبکدوش ہونے والے سفیر سن وی ڈونگ کا کہنا ہے کہ سی پیک نے پاکستان کا شدید توانائی بحران حل کرنےمیں مددکی۔سینیٹر مشاہد حسین سید کی 
زیر صدارت سی پیک پارلیمانی کمیٹی کا اجلاس ہوا جس میں چینی سفیر سن وی ڈونگ نے بھی شرکت کی۔
پارلیمانی کمیٹی کے اعلامیے کے مطابق چینی سفیر نے خطاب کرتے ہوئے بتایا کہ ان کے والد بھی 1952ء سے 1958ء تک پاکستان میں چین کے سفیر رہے۔انہوں نے کہا کہ پاکستان اور چین کے درمیان عوامی تبادلوں میں اضافہ ہوا ہے، 2016ء میں پاکستان اور چین کے2لاکھ افرادایک دوسرے کے ملک گئے، چین میں 22ہزار پاکستانی طلبہ زیر تعلیم ہیں۔چینی سفیرکا مزید کہنا ہے کہ سی پیک منصوبوں سے 1820میگاواٹ بجلی سسٹم میں شامل ہوچکی،نومبر2017ء کے بعد سسٹم میں اضافی بجلی ہو گی۔
پارلیمانی کمیٹی کے اعلامیے کے مطابق چیئرمین کمیٹی مشاہد حسین سید نے چینی سفیر کی 4سالہ خدمات کو سراہتے ہوئے کہا کہ چینی سفیر نے سی پیک منصوبے پر عملدرآمد میں اہم کردار ادا کیا۔انہوں نے مزید کہا کہ چینی سفیر اور ان کے خاندان نے پاک چین دوستی میں بہترین کردار ادا کیا۔
