پیرس، تمام پاکستانی وکشمیری برادری 05 فروری کو کشمیر کی آزادی کیلئے ہرسطح پرآواز اٹھائیگی، چوہدری اصغر خان
پیرس؍اسلام آباد(ایس ایم حسنین) پاکستان مسلم لیگ ن یوتھ ونگ فرانس کے صدر چوہدری محمد اصغر خان نے 05 فروری کو پیرس میں کشمیر ڈے کے انعقاد کے حوالے سے اپنے بیان میں کہا کہ کشمیر پاکستان کی شہ رگ ہے اور 05 فروری کو پیرس بھر میں ہرسطح پر کشمیری بھائیوں کیلئے آواز اٹھائیگی۔
انہوں نے کہا کہ پاکستانی وکشمیری کمیونٹی متحد ہے اور پاکستان مسلم لیگ ن نے ہمیشہ بھرپور طریقے سے کشمیر کیلئے آواز اٹھائی ہے انشااللہ پارٹی اور تمام سیاسی وسماجی وابستگیوں سے بالا تر ہوکر پاکستانی وکشمیری کمیونٹی متحد ہونے کا ثبوت پیش کریگی۔
انہوں نے کہا کہ پاکستان کے بانی قائداعظم محمد علی جناح نے کشمیر کو پاکستان کی شہ رگ قرار دیا تھا۔ بدقسمتی سے اس شہ رگ سے اس قدر خون بہہ چکا ہے کہ جنت نظیر کشمیر کی وادی لہو رنگ ہوچکی ہے۔ مقبوضہ کشمیرکے بہادر دلیر، جرأت مند اور غیرت مند کشمیری بھائیوں نے قربانیوں کی ایک نئی تاریخ رقم کی ہے جس کی مثال دنیا کی تاریخ میں کم ہی ملتی ہے۔ ہمارے کشمیری بھائی نسل در نسل اپنی آزادی کیلئے ظالم سنگ دل حکمرانوں اور فوج کیخلاف جنگ لڑ رہے ہیں۔ پاکستان کے عوام اور اوورسیز پاکستانیوں کا مقبوضہ کشمیر کے بارے میں موقف بڑا واضح اور دو ٹوک ہے وہ ایک قوم کی حیثیت سے متحد اور متفق ہو کر اپنے کشمیری بھائیوں کے ساتھ کھڑے ہیں۔
