پیرس،بھاڑ میں جائے تمہاری پارلیمنٹ، ہمارے لئے محمد ﷺ سے بڑھ کر کچھ نہیں، صدر مسلم لیگ ن (یوتھ ونگ ) فرانس چوہدری افضل لنگاہ نے احتجاجاً ن لیگ چھوڑنے کا اعلان کردیا،
پیرس(یس اردو نیوز) مسلم لیگ ن (یوتھ ونگ)فرانس کے صدر چوہدری افضل لنگاہ نے ختم نبوت معاملہ پر ن لیگی حکومت اورپارٹی کے بڑوں کے متنازعہ کردار اور بھونڈی سیاست کرنے پر احتجاجاًاستعفے کا اعلان کردیا اور ن لیگ مکمل طور پر چھوڑنے کا بھی اعلان کردیا۔ چوہدری افضل لنگاہ نے یس اردو نیوز سے گفتگو کرتے ہوئے کہا کہ وہ جتنا عرصہ ن لیگی قیادت کے ساتھ منسلک رہے وہ اس عرصے کیلئے اللہ تبارک و تعالیٰ اور اس کے حبیب ﷺ سے معافی کے خواستگار ہیں اور اس عمل پر تائب ہو کر ن لیگ کو مکمل طور پر چھوڑنے کا اعلان کردیا۔
انہوں نے کہا کہ ن لیگی قیادت کو ان کے اور ان کے ساتھیوں کی طرف سے متعدد مرتبہ واضح پیغام دیا گیا اور اس معاملے کو خوش اسلوبی سے حل کرنے کی التجا بھی کی گئی مگر قیادت نے معاملہ کو ایمان کے ترازو میں نہیں تولا اور بھونڈی سیاست سے کام لیا جس کی وجہ سے تمام مسلمانوں اور ان کے ذاتی جذبات کو ٹھیس پہنچی ہے ۔ اور وہ شقی القلب قائدین اور ان کے پیروکاروں سے مکمل قطع تعلق کرتے ہوئے پارٹی کو ہمیشہ کیلئے خیرباد کہہ رہے ہیں ۔
