کراچی: ایم کیوایم پاکستان کے رہنما رؤف صدیقی کا کہنا ہے کہ چئیرمین پیپلزپارٹی بلاول بھٹو زرداری کی شادی ان کا ذاتی معاملہ ہے لیکن میری خواہش ہے کہ وہ اپنی پسند اور محبت کی شادی کریں۔
کراچی میں انسداد دہشت گردی عدالت کے باہر میڈیا سے بات کرتے ہوئے ایم کیوایم پاکستان کے رہنما رؤف صدیقی کا کہنا تھا کہ بلاول بھٹو کی شادی کا معاملہ ان کا ذاتی ہے تاہم میں ان کو مشورہ دوں گا کہ جو لڑکی ان کے ساتھ چلے اس سے اور اپنی پسند اور محبت کی شادی کریں۔
رؤف صدیقی کا کہنا تھا کہ میں نے کسی دہشت گرد کا علاج نہیں کرایا، دہشت گردی تو بہت دور کی بات ہے میں کسی دہشت گرد کو جانتا بھی نہیں، بحیثیت پاکستانی عدالتوں کو مضبوط دیکھنا چاہتا ہوں ملکی عدالتیں مضبوط ہوں گی تو امن قائم ہوگا، عدالت سے امید تھی کہ مجھے انصاف ملے گا اور مجھے انصاف ملا انصاف کے فیصلے نے مجھے قوت اور توانائی بخشی ہے۔
ان کا کہنا تھا کہ کراچی کے مئیر وسیم اختر پر جو الزامات لگائے گئے ہیں وہ قابل ضمانت ہیں وسیم اختر کی رہائی سے شہر میں ترقیاتی کاموں کا آغاز ہوگا شہرمیں تعمیرات ہوں گی تولوگوں کوروزگارملےگا۔
کراچی میں پھر سے شروع ہونے والی ٹارگٹ کلنگ کے حوالے سے رہنما ایم کیوایم کا کہنا تھا کہ ملک میں 6 ماہ تک امن وامان قائم رہا جس کے لئے سیکیورٹی اداروں کے اہلکاروں نے اپنیجانوں کا نذرانہ پیش کیا امن وامان سب سےاہم مسئلہ ہے، جسے ہرصورت قائم ہونا چاہئے، میں 3 سال تک صوبائی وزیرداخلہ بھی رہا ہوں، مجھے علم ہے کہ تخریب کاری یا دہشت گردی کا ایک بھی واقعہ آپ کی کارکردگی پر سوالیہ نشان لگا دیتا ہے، دہشت گردی کی وجوہات کا پتہ چلانا ہوگا کہ اس کے پیچھے کون سے عوامل اور ہاتھ کارفرما ہیں۔
