ترکی کے دورے پر گئے ہوئے آرمی چیف جنرل قمر جاوید باجوہ نے ترک صدر رجب طیب اردوان سے ملاقات کی ہے جس میں باہمی دلچسپی اور علاقائی سلامتی کے امور پر تبادلہ خیال کیا گیا۔
ترک صدر نے پاکستان اور پاک فوج کی دہشت گردی کے خلاف جنگ میں قربانیوں کو سراہا۔آئی ایس پی آر کے مطابق آرمی چیف جنرل قمر جاوید باجوہ نے ملاقات میں پاکستان کےلیے حمایت اور خطے میں امن واستحکام کےلیے ترکی کردار پر ترک صدر کا شکریہ ادا کیا۔ترک صدر نے دہشت گردی کے خلاف جنگ میں قربانیوں اور خطے امن و استحکام کےلیے پاکستان اور پاک فوج کےکردار کو سراہا۔ترک صدر رجب طیب اردوان نے کہا کہ اسلامی ممالک عالمی امن و استحکام میں اہم کردار ادا کر سکتے ہیں،مذاکرات کے ذریعے تنازعات کے حل کےلیے او آئی سی کا پلیٹ فارم موجود ہے۔
انہوں نے کہا کہ دونوں برادر ملکوں کے کثیر الجہتی تعاون کے مثبت اثرات ہوں گے، ملاقات میں اتفاق کیا گیا کہ ترکی اور پاکستان کے درمیان ہمیشہ غیر مشروط اور مخلصانہ تعلقات رہے ہیں۔
اس سے قبل آرمی چیف جنرل قمر جاوید باجوہ نے ترک وزیر دفاع فکری اسک سے ملاقات کی ۔آئی ایس پی آر کے مطابق آرمی چیف جنرل قمر جاوید باجوہ کی ترک وزیردفاع سے ملاقات میں دو طرفہ سیکیورٹی تعاون اور باہمی دلچسپی کے امور پر تبادلہ خیال کیا گیا۔آرمی چیف اور ترک وزیر دفاع نے دفاعی پیداوار اور سیکیورٹی پالیسز کے شعبے میں تعاون پر اتفاق کیا۔
