بغداد(ویب ڈیسک) عراق میں نامعلوم مسلح افراد نے نامور ماڈل اور سوشل میڈیا اسٹار تارا فاریس کو گولیاں مار کر قتل کردیا۔
بین الاقوامی ذرائع کی رپورٹس کے مطابق 22 سالہ تارا پر اس وقت قاتلانہ حملہ کیا گیا جب وہ گاڑی میں سوار ہو کر اپنے رشتہ داروں کے پاس جارہی تھیں کہ اچانک ہی راستے میں مسلح افراد نے ان کی گاڑیوں پر گولیوں کی بوچھاڑ کردی۔ جس میں تارا بھی زخمی ہو گئی اور زخموں کی تاب نہ لاتے ہوئے ہلاک ہو گئی، مقتولہ کی لاش بعد ازاں بغداد کے شیخ زید اسپتال منتقل کی گئی جہاں ڈاکٹرز نے بتایا کہ انہیں 3 گولیاں لگیں جس سے ان کی موت موقع پر ہی ہوگئی تھی۔ عراقی وزارت داخلہ نے معروف ماڈل کی اندوہناک واقعے میں موت کی تحقیقات شروع کردی ہیں اور پولیس نے ابتدائی شواہد اکٹھے کرلیے ہیں۔
تارا فاریس کی موت نے نہ صرف ان کے رشتہ داروں کو غمگین کردیا ہے بلکہ سوشل میڈیا پر لاکھوں فین اور فالورز بھی افسردہ ہو گئے ہیں۔ فاریس کے صرف انسٹا گرام پر فالوورز کی تعداد 27 لاکھ سے زائد تھی ، مقتولہ عراقی کردستان کے صدر مقام اربیل میں مقیم تھیں تاہم وہ تواتر سے بغداد آتی جاتی تھیں۔
واضح رہے کہ اس سے قبل عراق میں نامعلوم افراد نامور خواتین کو نشانہ بنارہے ہیں، چند روز قبل ہی بصرہ میں عراقی ہیومن رائٹس کی ورکر کو قتل کردیا گیا تھا۔
