اسلام آباد(نیوز ڈیسک) سپیکر قومی اسمبلی سر دار ایاز صادق سے پاکستان میں تر کی کے سفیراحسان مصطفی یرداکول کی ملاقات ہوئی۔ ملاقات میں دو طرفہ تعلقات،سمیت اہم علاقائی و عالمی امور پر تبادلہ خیال کیا گیا۔ سپیکر قومی اسمبلی سردار ایاز صادق نے اس موقع پر کہا کہ پاکستان اور تر کی مشترکہ مذہب،ثقافت اور تاریخ کے لازوال رشتوں میں بندھے ہوئے ہیں۔
پاکستان اورتر کی اہم عالمی و علاقائی امور پر یکساں موقف کے حامل ہیں اور دونوں ممالک نے علاقائی و عالمی فورمز پر ہمیشہ ایک دوسرے کے موقف کی حمایت کی ہے۔ پاکستان اور تر کی کے عوام کے دل ایک ساتھ دھڑکتے ہیں۔دونوں برادر اسلامی ممالک ہر مشکل وقت میں ایک دوسر ے کے شانہ بشانہ کھڑے رہے ہیں۔ پاکستان کو تر کی کے ساتھ اپنی بے مثال دوستی پر فخر ہے۔دونو ں ممالک کی قیادتیں موجودہ تعلقات کو نئی وسعتوں سے ہمکنار کرنے کے لیے کوشاں ہیں اوردونوں ممالک میں حالیہ سالوں میں اقتصادی و تجارتی تعلقات کو فروغ حاصل ہوا ہے۔ دونو ں ممالک کے اراکین پارلیمنٹ ہم آہنگی کے فروغ اور دونوں اقوام کومزید قریب لانے میں اہم کردار ادا کر سکتے ہیں۔
احسان مصطفی یرداکول نے اظہار خیال کرتے ہوئے کہا کہ تر کی پاکستان کے ساتھ اپنے قریبی دوستانہ تعلقات کو قدر کی نگا ہ سے دیکھتا ہے۔ تر کی کے عوام پاکستان کو اپنا دوسرا گھر تصور کرتے ہیں اور تر کی ایک خوشحال اور مضبوط پاکستان دیکھنے کا خواہاں ہے۔خطے میں امن و خو شحالی کے لیے پاکستان کا کردار انتہائی اہمیت کا حامل ہے۔ پاکستان میں بطور سفیر تعیناتی میر ے لیے باعث فخر ہے۔
