علیمہ خان کو جائیداد خریدنی نہیں چاہیے تھی، اگر خریدی تو اب پیش ہوگئیں: علی امین گنڈاپور

ڈیرہ اسماعیل خان (ویب ڈیسک) وفاقی وزیر علی امین گنڈا پور نے کہاہے کہ وزیراعظم کی بہن علیمہ خان کو بیرون ملک جائیداد نہیں خریدنی چاہئے تھی لیکن اس وقت ہرکوئی خریدرہاتھا، انہوں نے بھی اگر خریدلی تو اب وہ پیش ہوگئی ہیں۔ نجی ٹی وی چینل ’اے آر وائے نیوز‘ کے پروگرام ”آف دی ریکارڈ“ میں گفتگوکرتے ہوئے علی امین گنڈا پور نے کہا کہ کوئی شکایت کرے تو وزیر اعلیٰ متعلقہ حکام سے بازپرس کرسکتا ہے ،عدالت میں ہر کیس کومکمل کرنے کی ایک مدت ہونی چاہئے ، خیبرپختونخوا کی صوبائی حکومت نے قوانین پر پشاور ہائیکورٹ کے ساتھ مل کر کام کیاہے۔ ایک سوال کے جواب میں ان کاکہناتھاکہ زرداری نے چوری کی اور بلاول کھائیں گے لیکن اب بلاول کہہ رہے ہیں کہ مجھے توکسی بات کا پتہ ہی نہیں ہے، زرداری سے پوچھیں۔