لاہور(نیوز ڈیسک) وزیر اعظم عمران خان کی ہدایت پر پنجاب حکومت نے سرکاری ریسٹ ہائوسز کوعوام کے لئے کھولنے پر کام شروع کر دیا ،وزیر سیاحت نے سیاحتی مقامات پر واقع تمام محکموں کے ریسٹ ہائوسز کے حوالے سے دس روزمیں رپورٹ طلب کر لی۔وزیر سیاحت پنجاب راجہ یاسر ہمایوں کی زیر صدارت میں اہم اجلاس ہوا جس میں سیکرٹری سیاحت ندیم محبوب ، ایم ڈی ٹی ڈی سی پی احمد ملک سمیت متعلقہ محکموں کے افسران نے شرکت کی۔اجلاس میں وزیر سیاحت کو مختلف محکموں کی جانب سے ریسٹ ہائوسز کی تفصیلات فراہم کی گئیں جس پر وزیر سیاحت نے سیاحتی مقامات پر واقع تمام محکموں کے ریسٹ ہائوسز کے حوالے سے دس دن میں رپورٹ طلب کر لی۔وزیر سیاحت راجہ یاسر ہمایوں تفصیلات سے وزیر اعظم عمران خان کو آگاہ کریں گے۔راجہ یاسر ہمایوں نے کہا کہ وزیر اعظم کے احکامات کے مطابق تمام محکمے ریسٹ ہائوسز عوام کے لئے کھولنے کے پابند ہیں،سیاحت کے لئے موزوں اضلاع میں موجود ریسٹ ہائوسز سے متعلق تفصیلات آئندہ میٹنگ میں پیش کی جائیں ۔وزیر سیاحت نے کہا کہ ریسٹ ہائوسز کی بکنگ کا طریقہ کار آن لائن ہوگا، ریسٹ ہائوسز کی ملکیت اور دیکھ بھال سے متعلق امور متعلقہ محکمہ کے پاس ہی رہیں گے۔محکمہ کے افسران محکمانہ ذمہ داریوں کے لئے ریسٹ ہائوس استعمال کر سکیں گے، ریسٹ ہائوس کا کرایہ بھی متعلقہ محکمہ حاصل کرے گا۔انہوںنے کہا کہ پچھلے ادوار میں تعلقات کی بنا ء پر ریسٹ ہائوسز طاقتور لوگ استعمال کر رہے تھے لیکن اب ایسا نہیں ہوگا۔تحریک انصاف کی حکومت میں عام آدمی بھی سرکاری ریسٹ ہائوسز استعمال کر سکے گا۔ ٹی ڈی سی پی اور متعلقہ محکمہ اپنی ویب سائٹ پر خالی ریسٹ ہائوسز کے حوالے سے تفصیلات جاری کرے گا۔لوگ ٹی ڈی سی پی اور متعلقہ محکمہ کی ویب سائٹ سے ریسٹ ہائوسز کو بک کروا سکیں گے۔انہوںنے کہا کہ پنجاب حکومت ریسٹ ہائوسز کی تزین و آرائش اور قابل استعمال بنانے کیلئے فنڈز فراہم کرے گی۔
گورنر ہائوسز کے بعد اب یہ جگہ بھی عوام کیلئے کھول دی جائے،
