پنجاب میں رینجرز خوش آمدید، حذیفہ رحمان

میڈیاکی اکثریت سمیت تمام مخصوص حلقوں نے تاثر دیا کہ روجھان مزاری میں چھوٹو گینگ نے بڑے دہشت گرد گروہوں کو پناہ دی ہوئی ہے۔مگر جب آپریشن منطقی انجام تک پہنچا تو چھوٹو مزاری کے علاوہ کوئی اور گرفتار نہ ہوسکا۔ چھوٹو گینگ کو گرفتار کرکے حساس اداروں کی تحویل میں دیا گیا۔مگر بالآخر اس کو یہ کہہ کر پنجاب حکومت کی جے آئی ٹی کے حوالے کیا گیا کہ یہ صرف علاقائی کریمنل ہے۔گزشتہ چند دنوں سے ایک مرتبہ پھر پورے صوبے میں یہ فضا قائم کی گئی کہ پنجاب میں رینجرز ناگزیر ہیں۔جس کے بعد وزارت داخلہ پنجاب نے ایک سمری وزیراعلیٰ شہباز شریف کو بھجوا دی،جو منظوری کے بعد وفاقی وزیر داخلہ کو بھجوائی جائے گی۔رینجرز کے معاملے پر پنجاب حکومت کا اب بھی یہ موقف ہے کہ رینجرز کو صوبے میں پولیس کے اختیارات نہیں دئیے جائیں گے بلکہ رینجرز پولیس اور سی ٹی ڈی کے ساتھ مل کر انٹیلی جنس آپریشن کرے گی۔پنجاب کے سینئر صوبائی وزیر رانا ثنااللہ نے برطانونی نشریاتی ادارے کو انٹرویو میں موقف دیا ہے کہ پنجاب میں رینجرز پہلے بھی موجود تھی مگر اب اس کی تعداد بڑھائی جارہی ہے۔جس طرح ماضی میں راجن پور کے کچے علاقے میں رینجرز نے پولیس کے ساتھ مل کر کارروائی کی اب صوبے کے مختلف حصوں میں اپیکس کمیٹیوں کی منظوری سے کارروائی کی جائے گی۔یہ ایک خوش آئند بات ہے کہ صوبے کے ہر کونے سے دہشت گردی کا خاتمہ ہونا اشد ضروری ہے ۔لیکن کیا یہ درست ہے کہ محض پنجاب میں رینجرز کی ضرورت صرف اس لئے ہے کہ سندھ میں بھی رینجرز موجود ہے۔پنجاب میں رینجرز آپریشن کی حمایت کرنے والے صرف یہ بتادیں کہ صوبے میں ایسی کونسی جگہ ہے جہاں پر کراچی جیسے حالات ہیں۔کیا پنجاب کے لوگ دیگر صوبوں کے مقابلے میں زیادہ پرسکون اور محفوظ زندگی نہیں گزار رہے ؟محض اس لئےکہ کوئی دوسرا صوبہ راضی ہو ،پنجاب میں رینجرز کو بلایا جائے مناسب نہیں ہوگا۔اگر حالات ناگزیر ہیں تو ضرور بلایا جائےوگرنہ دیکھا گیا ہے کہ انٹیلی جنس کی بنیاد پر آپریشن کے زیادہ بہتر نتائج سامنے آئے ہیں ۔

صوبے میں رینجرز کی آمد میں تاخیر کی وجہ بھی یہی تھی کہ جب پہلے ہی رینجرز و دیگر قانون نافذ کرنے والے ادارے پولیس کے ساتھ مل کر انٹیلی جنس کی بنیاد پر کارروائیاں کررہے ہیں تو پھر باقاعدہ طور پر ایک ادارے کو مصروف کرنے کیا ضرورت ہے۔کیونکہ یہ ہماری آخری ڈیفنس لائن ہے،جو ہمارے بارڈر اور سرحدوں کی محافظ ہے۔پوری دنیا کا اصول ہے کہ فوج کو کبھی بھی شہری حلقوں میں مصروف نہیں کیا جاتا۔ہاں ،کراچی میں ناگزیر حالات تھے ،جس پر رینجرز کو مکمل اختیارات دئیے گئے۔بلاشبہ انہوں نے وہاں پر اچھی کارکردگی کا مظاہرہ کیا۔مگر کراچی میں بھی اب اس معاملے کا سیاسی حل نکالیں۔کیونکہ ہمیشہ معاملات کا سیاسی حل ہی دیرپا اور دوررس نتائج کا حامل ہوتا ہے۔آپ سندھ میں ان کا قیام جتنا طویل کریں گے اتناادارے کے متنازع ہونے کا خدشہ ہوگا۔تمام مہذب ممالک میں آزمودہ اصول ہے کہ فوج جتنا شہری علاقوں سے دور رہے گی اتنا ہی غیر متنازع ہوگی۔ہم سب کو چاہئے کہ اداروںکی ساکھ کو نقصان پہنچانے سے بچائیں۔اب اگر پنجاب میں رینجرز کو صرف اس لئے بلایا گیا ہے کہ ملک کے دیگر حصوں میں بھی یہ موجود ہے تو یہ کوئی معقول توجیہہ نہیں ہوگی۔ہاں اگر حالات واقعی ناگزیر ہیں تو اس پر پورے صوبے کےعوام کو اعتماد میں لیں اور کارروائیوں کا آغاز کریں۔کیونکہ ایک تاثر یہ بھی ہے کہ مسلم لیگ ن اور وزیراعظم نوازشریف پنجاب کے مینڈیٹ کے بل بوتے پر سویلین بالادستی اور ایگزیکٹو کی مضبوطی کی بات کرتے ہیں۔جب صوبائی چیف ایگزیکٹو کے اختیارات ہی تقسیم ہوجائیں گے تو حکمران جماعت خود بخود کمزور ہوناشروع ہوجائے گی۔اگر واقعی ایسا ہے تو پھر کسی کے لئے بھی نتائج اچھے نہیں ہوں گے۔