ویرات کوہلی اور انوشکا شرما شادی کے بندھن میں بندھ گئے، بھارتی میڈیا
کئی دنوں سے جاری رہنے والی قیاس آرائیوں کے بعد بھارتی کرکٹر ویرات کوہلی اور اداکارہ انوشکا شرما آج شادی کے بندھن میں بالآخر بندھ گئے ہیں۔بھارتی میڈیا کے مطابق دونوں کی شادی کی خبریں زیر گردش ہیں اور دونوں کی شادی کی تقریبات بھی اٹلی میں جاری ہیں۔دونوں کی شادی کی مختلف تاریخوں کے حوالے سے افواہیں زیر گردش رہیں لیکن اب بھارتی میڈیا نے بالی وڈ اور کرکٹ کی سب سے بڑی شادی کا دعویٰ کردیا ہے۔
بھارتی میڈیا کے مطابق ویرات کوہلی اور انوشکا شرما اٹلی کے مہنگے ترین ریزورٹس بوگو فینو چیتو پر آج رشتہ ازدواج میں منسلک ہوگئے ہیں۔شادی کی تقریب میں خاندان اور قریبی دوست شریک ہیں جب کہ دونوں کی شادی ہندو رسم و رواج کے تحت کی گئی ہے جس کے بعد پنجابی رسم و رواج سے بھی شادی ہوگی۔اس سے قبل بھارتی فلم نیوز ویب سائٹ نے دعویٰ کیا تھا کہ ویرات کوہلی اور انوشکا شرما نے اپنی شادی کو خفیہ رکھنے اور کیمرے کی آنکھوں سے دور رکھنے کے لیے بانڈ سائن کروائے ہیں۔ویرات کوہلی اور انوشکا شرما 26 دسمبر کو بھارت میں بھی شادی استقبالیہ دیں گے
