بالی وڈ فلم نگری میں تیزی سے ترقی کی منازل طے کرنے والے اداکار ورن دھون خوبرو اداکارہ انوشکا شرما کے ساتھ پہلی بار بڑی اسکرین پر نظر آئیں گے۔
ورن اور انوشکا ایک ساتھ یش راج فلم کے بینر تلے بننے والی فلم “سوئی دھاگا میڈ اِن انڈیا” میں دکھائی دیں گے۔ ورن دھون کا کہنا تھا کہ گاندھی جی سے لے کر مودی جی تک ہمارے لیڈرز نے ہمیشہ میڈ اِن انڈیا کا نعرہ لگایا اور مجھے فخر ہے کہ فلم سوئی دھاگا کے ذریعے میں اُن کا یہ پیغام کروڑوں لوگوں تک دلکش انداز میں پہنچاؤں گا۔
ورن کا کہنا تھا کہ انہیں فلم کی کہانی بہت پسند آئی ہے اور امید ہے اداکارہ انوشکا شرما کے ساتھ ان کی یہ پہلی فلم سپرہٹ ہوگی۔ دوسری جانب اداکارہ انوشکا کا کہنا تھا کہ مجھے ہمیشہ انوکھی اور دلچسپ فلمیں پسند آتی ہیں اور فلم سوئی دھاگا کی کہانی خود انحصاری پر مبنی ہے، ایسی کہانیوں سے لوگ خود کو آسانی سے جوڑ سکتے ہیں۔ اس فلم کے رائیٹر اور ہدایت کار شرت کٹاریا جب کہ پروڈیوسر منیش شرما ہیں جب کہ فلم آئندہ سال جنوری میں مہاتما گاندھی کی سالگرہ پر ریلیز ہوگی۔
