پنجاب کے وزیراعلیٰ محمد شہباز شریف کا کہنا ہے کہ وسائل کو قومی امانت سمجھ کر پائی پائی دیانتداری اور شفافیت کے ساتھ استعمال کی، بجلی کے بحران کا خاتمہ تاریخی کارنامہ ہے، جسے قوم ہمیشہ یاد رکھےگی۔

لاہور سے جاری بیان میں وزیراعلیٰ پنجاب نے کہا کہ 1 ہزار 320 میگا واٹ ساہیوال کول پاور پلانٹ 22 ماہ کی ریکارڈ مدت میں مکمل کیا گیا، بجلی منصوبوں کی تیز رفتار تکمیل کے عالمی ریکارڈ بن رہے ہیں۔ انہوں نے کہا کہ عوامی خدمت کے نئے وژن کے ساتھ 2018ء کے انتخابات میں بھی کامیابی حاصل کریں گے۔ شہباز شریف کا کہنا تھا کہ ایک جانب وسائل لوٹنے والے سابق حکمران ہیںتو دوسری طرف دھرنوں کی آڑ میں معیشت کے ساتھ گھناؤنا کھیل کھیلنے والے ہیں، جب اقتدار سنبھالا تو توانائی کا مسئلہ گھمبیر صورت اختیار کر چکا تھا، غربت، افلاس، بے روز گاری اور بجلی کے اندھیرے سابق حکمرانوں کے تحفےہیں۔