سوشل میڈیا پر سنجے دت اور ریکھا کی شادی کی افواہیں
1984 میں سنجے دت اور ریکھا کی شادی کی خبریں پھیلی ہوئی تھیں فوٹو: فائل
ممبئی: بالی ووڈ کی سپر اسٹار ریکھا کی سوانح عمری شائع ہونے کے بعد آج کل سوشل میڈیا میں یہ افواہیں گرم ہیں کہ سدا بہار حسن کی مالک اداکارہ کئی برسوں سے سنجے دت کو اپنا شوہر مانتی ہیں اور ہندو عقیدے کے مطابق وہ اپنی مانگ میں سنجو بابا ہی کے نام کا سندور لگاتی ہیں۔
بالی ووڈ اداکارہ ریکھا کی سوانح عمری ’’ریکھا۔۔ دی انٹولڈ اسٹوری‘‘ کی بنیاد پر آج کل سوشل میڈیا پر یہ افواہیں گرم ہیں کہ 1984 میں ریکھا اور سنجے دت نے شادی کرلی تھی اور اب تک ریکھا انہیں اپنا شوہر مانتی ہیں اور ہندو عقیدے کے مطابق ان ہی کے نام کا سندور لگاتی ہیں۔
اس خبر کو بھی پڑھیں : ترشلا اداکارہ بنتی تو ٹانگیں توڑ دیتا
دوسری جانب سوانح عمری کے مصنف یاسر عثمان نے اس کی تردید کرتے ہوئے کہا ہے کہ اس طرح کی افواہیں پھیلانے والوں نے کتاب کو صحیح طریقے سے پڑھا ہی نہیں، انہوں نے ایسی کوئی بات کتاب میں لکھی ہی نہیں۔ 1984 میں جب سنجے دت اور ریکھا ’’زمین آسمان ‘‘ میں ایک ساتھ کام کررہے تھے تو دونوں کی شادی کی خبریں پھیلی ہوئی تھیں اور اس کی تردید سنجے دت نے بھی کی تھی۔
اس خبر کو بھی پڑھیں : سنجے دت ایک اور مقدمے میں پھنس گئے
یاسر عثمان نے مزید کہا کہ یہ وہ وقت تھا جب ریکھا کا نام کئی اداکاروں اور یہاں تک کہ پروڈیوسرز کے ساتھ بھی جوڑا جارہا تھا ان میں کمل ہاسن، شیلندرا سنگھ اور راجیو کمار بھی شامل تھے۔ سنجے دت سے ریکھا کی شادی کی خبروں کو صرف اس لیے تقویت ملی کیونکہ سنجو بابا نے ان افواہوں کو اہمیت دی اور ان کی تردید کی تھی۔
