ن لیگ کراچی کے کارکنان پیپلز پارٹی میں شامل ہو رہے ہیں: سعید غنی

کراچی: پاکستان پیپلز پارٹی کراچی ڈویژن کے صدر سعید غنی کا کہنا ہے کہ مسلم لیگ ن کراچی سے تعلق رکھنے والے افراد پیپلز پارٹی میں شمولیت اختیار کر رہے ہیں، پیپلز پارٹی نے شہر کے ہر حلقے سے امیدوار کھڑے کیے ہیں۔۔کراچی میں بلاول ہاوس میں مسلم لیگ ن کے اراکین کی پیپلز پارٹی میں شمولیت اختیار کرنے کے موقع پر پریس کانفرنس کرتے ہوئے کراچی ڈویژن کے صدر سعید غنی کا کہنا تھا کہ بلاول بھٹو کراچی پر خاص توجہ دے رہے ہیں۔ بلاول بھٹو نے شہر کو نفرتوں کی سیاست سے نکالنے کا عزم کیا ہوا ہے۔ پاکستان پیپلز پارٹی کراچی میں حیران کن نتائج دے گئی۔ پیپلز پارٹی نے کراچی کےتمام حلقوں سے اپنے امیدوار کھڑے کئے ہیں. سعید غنی کا کہنا تھا کہ گورنر ہاؤس میں ایک الیکشن سیل بنایا گیا ہے جو مسلم لیگ نون اور ایم کیو ایم کے لئے بنایا گیا ہے۔ الیکشن کمیشن سے کہتا ہوں کہ وہ اس چیز کا نوٹس لیں، ہمارے کچھ لوگوں پر دباو ڈال کر پارٹیاں تبدیل کرائی جارہی ہیں۔ سعید غنی نے پیپلز پارٹی میں آنے والے ن لیگ کے کارکنان کا شکریہ ادا کیا اور کہا کہ ان کی شمولیت سے پیپلز پارٹی مضبوط ہوگی۔