پشاور میں تحریک انصاف کے کارکنوں نے ہزار خوانی گرڈ اسٹیشن پر دھاوا بول دیا اور بند فیڈر خود ہی کھول دئیے۔
تحریک انصاف کےرکن صوبائی اسمبلی فضل الہٰی کی قیادت میں کارکن ہزار خوانی گرڈ اسٹیشن میں داخل ہوگئے اور ’گو نواز گو ‘کے نعرے لگائے۔رکن اسمبلی نے کئی علاقوں کے بند فیڈرز خود ہی کھول دیئے۔ فضل الٰہی کا کہناہے کہ ہزار خوانی فیڈر سے منسلک 100 دیہات میں 20 گھنٹے تک لوڈشیڈنگ کی جاتی ہے، بجلی بحال نہیں کرتے تو خود ہی آگے آئیں گے۔
انہوں نے کہا کہ پیسکو حکام سے مذاکرات کے بعد بھی بجلی کی لوڈشیڈنگ ختم نہیں کی گئی۔ دوسری جانب ترجمان پیسکو کا کہنا ہے کہ ایم پی اے فضل الہٰی کے حلقے میں 70 فیصد خسارے کا سامنا ہے، رمضان کی وجہ سے ان علاقوں میں لوڈشیڈنگ میں کمی کرکے 16 گھنٹے کردی ہے، کوشش ہوگی کہ سحری اور افطاری میں لوڈشیڈنگ نہ کی جائے۔ ترجمان کا مزید کہنا ہے کہ ان علاقوں کے عوام کنڈے ہٹا کر میٹر لگوائیں اور بل ادا کریں۔
