کھاریاں(ایم جعفری سے) کھاریاں پریس کلب کے بانی رکن، سینئر صحافی مرزا محمد صفدر نے کہا ہے کہ پریس کلب کے حالیہ انتخابات میں لیاقت قادری بھاری اکثریت سے کامیاب ہوں گے۔ ایک بیان میں انہوں نے کہا کہ لیاقت قادری انتہائی با صلاحیت، تعلیم یافتہ اور پیشہ ور صحافی ہیں جنہوں نے ہر دور میں قلم کی حرمت اور صحافت کے تقدس کی بالا دستی کیلئے کام کیا ہے۔ ان کی طرف سے جاری کردہ منشور صحیح معنوں میں صحافیوں کی امنگوں کا ترجمان ہے۔ مرزا محمد صفدر نے کہا کہ صحافیوں کیلئے پلاٹ، عمرہ کا ٹکٹ اور صحت و تعلیم کی سہولتیں بنیادی اہمیت کی حامل ہیں۔ لیاقت علی قادری نے جس احسن انداز میں ان ضروریات کو پورا کرنے کا ارادہ ظاہر کیا ہے اس سے ان کے اخلاص اور لگن کا اندازہ ہوتا ہے۔ انہوں نے کھاریاں پریس کلب کے اراکین سے اپیل کی کہ وہ آزمائے ہوئے لوگوں کو مت آزمائیں بلکہ ہمہ جہت صفات کے حامل لیاقت علی قادری کو ووٹ دے کر اپنے لئے بہترین قیادت کا انتخاب کریں۔
