Karachi: The case registered of child drowning in a wedding hall tank

کراچی کے مختلف علاقوں میں کارروائیوں کے دوران پولیس نے 3ملزمان کو گرفتار کرلیا جبکہ ٹیپو سلطان روڈ پرشادی ہال میں واقع واٹر ٹینک میں ڈوبنے والی بچی کا مقدمہ درج کرلیا گیا۔

پولیس کے مطابق ٹیپو سلطان روڈپر شادی ہال میں شادی میں شرکت کے لئے آنے والی ایک بچی پانی کے ٹینک میں گرکر جاں بحق ہوگئی،والدین بچی کو نجی اسپتال لے کر گئے تاہم ایم ایل او کے لئے کسی سرکاری اسپتال نہیں لے کرگئے۔واقعہ کا مقدمہ درج کرلیا گیا ہے تاہم بچی کے والدین نے ہال کے مالک اور انتظامیہ کو نامزد تو کرایا ہے لیکن ان کے نام نہیں درج کرائے۔

بغدادی کے علاقے شاہ بیگ لین میں پولیس نے کارروائی کرتے ہوئے گینگ وار ملزم رزاق بلوچ کو گرفتار کرلیا۔ملزمان لیاری کے مختلف علاقوں سے بھتہ وصولی میں ملوث ہے۔ملزمان کے ساتھی آغا شوکت،سکندر عرف سکو اور شیبو کی تلاش جاری ہے۔

ایس پی گلبرگ بشیر بروہی کے مطابق ایف بی ایریا بلاک 16 میں شہری کاشف سے لوٹ مار کرنے والے ملزم تیمور خان کو گرفتار کرلیا۔ملزم سابق پولیس اہلکار ہے،ملزم کے قبضے سے اسلحہ اور نقد رقم برآمد کرکے شہری کی مدعیت میں مقدمہ درج کرلیا گیا۔

ادھرگلشن اقبال میں پولیس نے کارروائی کرکے ارشد نامی اسٹریٹ کرمنل کو گرفتار کرلیا،ملزمان کے قبضے سے اسلحہ اور موٹرسائیکل ملی ہے۔