بالی ووڈ کے معروف اداکار عرفان خان کو برین ٹیومرکی تشخیص کے بعد ممبئی کے ایک اسپتال میں داخل کرادیا گیا۔ایک غیر معروف بھارتی ویب سائٹ ’ملینیم پوسٹ ‘نے دعویٰ کیا ہے کہ عرفان خان کو گلیو بلاسٹوما ملٹی فروم (جی بی ایم)چوتھے درجے کے کینسر کی نشاندہی ہوئی ہے جو کینسر کی مہلک ترین قسم ہے ۔واضح رہے کہ چند روز قبل عرفان خان نے خطرناک مرض میں مبتلا ہونے کی تصدیق خود ایک ٹوئٹ کے ذریعے کی تھی۔عرفان خان کا کہنا تھا کہ وہ اور ان کے دوست و اہل خانہ خطرناک بیماری کا صحیح پتہ لگانے میں مصروف ہیں اور انہیں جیسے ہی پتہ چلے گا وہ خود ہی مداحوں کو اس سے آگاہ کریں گے۔ان کا کہنا تھا کہ وہ گزشتہ 15 روز سے طبیعت میں خرابی محسوس کر رہے ہیں اور انہیں ابتدائی طور پر پتہ چلا ہے کہ وہ کسی خطرناک یا موذی مرض میں مبتلا ہیں۔دوسری جانب عرفان خان کی طبیعت ناساز ہونے کی وجہ سے ان کی آنے والی ایکشن تھرلر فلم ’سپنا دی دی‘ کی شوٹنگ منسوخ کردی گئی ہے۔فلم میں عرفان خان دوسری مرتبہ دپیکا پڈوکون کے ساتھ ایکشن میں نظر آئیں گے۔
