واشنگٹن …… امریکا میں داعش میں شمولیت اختیار کرنے والے دو شہریوں پر فرد جرم عائد کردی گئی۔
امریکی ذرائع ابلاغ کے مطابق دو روز قبل سیکیورٹی اداروں نے ورجینیا میں 28سالہ جوزف حسن فاروق اور25 سالہ محمد الحسان کو داعش میں شمولیت کی کوشش کے جرم میں گرفتار کیا تھا۔انہیں رچمنڈ انٹرنیشنل ایئرپورٹ سے اس وقت گرفتارکیا گیا جب وہ شکاگو جانے والی پروازمیں سوار ہونے کےلئے جارہے تھے۔امریکی محکمہ انصاف کے مطابق یہ افراد پہلے اردن اوراس کے بعد شام جانے کی کوشش کررہے تھے۔ ذرائع کے مطابق ان افراد پر داعش کی مالی امداد اور شمولیت کے الزامات عائد کئے گئے ہیں ۔ فاروق کا تعلق ریاست پنسلوانیا سے ہے جبکہ وہ اس سے قبل سوڈان سے امریکا آئے تھے ۔
