بھارتی فوج کے ہاتھوں شہید ہونیوالوں میں برہان وانی کا قریبی ساتھی سبزر احمد بٹ بھی شامل ہے، ان افراد کو دوران حراست گولیاں ماری گئیں۔
سرینگر: مقبوضہ کشمیر میں بھارت کی ریاستی دہشت گردی جاری ،برہان وانی کے قریبی ساتھی سبزراحمد بٹ سمیت 11 نوجوانوں کو شہید کر دیا ۔ جب کہ عوام نے بھارتی مظالم کے خلاف شدید احتجاج کیا تو درجنوں افراد کو لاٹھی چارج اور شیلنگ کا نشانہ بنا کر لہو لہان کردیا۔ کشمیر میڈیا سروس کے مطابق “بارہمولا” کے علاقے رامپور اور اڑی میں بھارتی فوج نے فائرنگ کر کے 8 کشمیریوں کو شہید کر دیا جبکہ پلواما کے علاقے میں برہان وانی کےقریبی ساتھی سبزر احمد بٹ سمیت تین نوجوانوں کو شہید کردیا ، ان افراد کو دوران حراست گولیاں ماری گئیں،سرچ آپریشن کے نام پر بھارتی فوج کئی گھروں میں بھی گھس گئی اور توڑ پھوڑکی۔ علاوہ ازیں ترال میں ہی کشمیری عوام نے بھارتی فوج کے بڑھتے ہوئے مظالم اور ریاستی دہشت گردی کے خلاف شدید احتجاج کیا۔ قابض افواج نے پرامن مظاہرین کو منتشر کرنے کے لیے ان کے خلاف طاقت کا استعمال کیا جس پر مظاہرین اور سیکورٹی اہلکاروں میں شدید جھڑپیں ہوئی جن میں درجنوں افراد زخمی ہوگئے۔ ادھرحریت رہنما شبیرشاہ نے دنیا نیوز سے گفتگو کرتے ہوئے کہا کہ وادی میں نہتے لوگوں اور نمازیوں کو شہید کیا جارہا ہے ، بھارت کو مقبوضہ کشمیر سے نکلنا ہوگا۔
