اسلام آباد(یس اردو نیوز) کرونا وبا کے دوران ماسک پہننے سے انکار کرنے والے امریکی صدر ڈونلڈ ٹرمپ نے بالاآخر ماسک پہن لیا۔ امریکہ کے صدر ڈونلڈ ٹرمپ نے تنقید اور شدید دباؤ کے بعد پہلی بار ماسک پہن لیا ہے۔ امریکی خبررساں ادارے کے مطابق واشنگٹن میں فوجی اسپتال کے دورے کے موقع پر ڈونلڈ ٹرمپ سیاہ ماسک پہنے نظر آئے جب کہ ماضی میں وہ ماسک پہننے سے مسلسل انکار کرتے رہے ہیں۔ اپریل میں وائٹ ہاؤس میں کوروناٹاسک فورس کے متعلق دی جانے والی بریفنگ میں امریکی صدر کو مشورہ دیا گیا کہ بہت سارے وائرس کی علامات ظاہر نہیں ہوتیں آپ ماسک استعمال کریں۔ جس پر ٹرمپ نے جواب دیا کہ میں نہیں پہنوں گا، میں ٹھیک ہوں۔ ٹرمپ نے اپنے معاونین کو بتایا کہ وہ ماسک اس لیے نہیں پہنتے کیوں کہ ایسا کرنے سے وہ کمزور نظر آئیں گے۔صدر ڑمپ نے مئی میں ماسک پہننے پر اپنے سیاسی حریف جو بائیڈن کا مذاق بھی اڑایا تھا۔ گزشتہ روز اسپتال جانے سے قبل انہوں نے صحافیوں کو بتایا کہ میں صرف اس لیے ماسک پہنوں گا کیوں کہ فوجیوں کی عیادت کیلئے اسپتال جا رہا ہوں اور باقاعدگی سے ایسا کرنے کا کوئی ارادہ نہیں ہے۔ صدر ٹرمپ گزشتہ روز زخمی فوجیوں کی عیادت کیلئے والٹر ریڈ ملٹری اسپتال کا دورہ کیا۔ صدر ٹرمپ نے اس موقعے پر سیاہ رنگ کا ماسک پہن رکھا تھا جس پر امریکی صدارتی مہر کا لوگو تھا۔ ٹرمپ اس موقعے پر صحافیوں سے بات کرتے ہوئے کہا: ’میں کبھی بھی ماسک کے خلاف نہیں رہا لیکن مجھے یقین ہے کہ ان کو مخصوص وقت اور جگہوں پر ہی استعمال کیا جاتا ہے‘۔
ماضی میں صدر ٹرمپ سیاسی ریلیوں، میڈیا بریفنگز اور دیگر مقامات پر ہمیشہ ماسک پہننے سے گریز کرتے رہے ہیں یہاں تک کہ وائٹ ہاؤس کے عملے میں اس وائرس کی تصدیق کے بعد بھی وہ اپنی ضد پر قائم رہے۔
